3D呢門技術，唔使一年時間已經Hit爆Game界！元祖級有XB360《阿凡達》，嫌單拖打機太悶，不如約埋班Friend，戴住副立體眼鏡齊齊打Online遊戲！喺PC平台期待已久嘅《天子傳奇Online》，8月6日正式俾大家下載，睇埋原著漫畫，更想親自討伐紂王，體驗呢種人神魔戰嘅立體快感。
記者：陳國輝
背景一般介面好3D
如果你係黃玉郎Fans，無理由未睇過《天子傳奇》啩！遊戲跟原著背景有無跟足，唔係重點，玩得呢隻Game，預咗對漫畫有份情意結，當然，今時今日電腦CG咁發達，人物角色如姬發、妲己以及姜太公等，只要大家欣賞咗過場動畫，畫工明顯比漫畫細緻得多多聲，無可挑剔。
但3D先係今次主打，《天》屬於製作商中華網龍第二款要戴立體眼鏡玩嘅遊戲，同3D電影分別係，該遊戲支援主動式3D技術，即電腦必須預裝埋3DDisplay硬件，例如nVIDIA3DVision，而且立體眼鏡要插電先玩到，比起入戲院睇，一定無咁方便，更要花多一、兩千蚊「筆直」添置新玩具，無疑又係額外成本。不過《天》入面確實有好多華麗場景，例如補天宮、地熱谷、凌霄殿以及玲瓏山等科幻場景，試玩一陣，發現選單介面勁立體，但遊戲畫面以及人物的動作，睇落仲好平面。
揀星宿助一臂
既然係MMORPG，例牌梗唔少得角色設定、儲Level、學魔法、買武器，然後聯群結黨打大佬等公式動作。《天》嘅戰鬥畫面尚算熱鬧，尤其使用魔法，爆炸場面更佔去畫面大部份，若然戴埋立體眼鏡嚟玩，體驗更豐富。
但講到戰鬥，除咗升呢，最重要原來係認識不同星宿，遊戲有所謂戰神、天狼、龍女以及羽靈等四大星宿，當配合到你嘅角色派系，佢能夠發揮最大效果，例如當羽靈配搭如來，在治療及輔助隊友方面有最佳效果，至於喺攻、防、練習時亦有唔同效果，大家選擇星宿前最好了解多啲先。
「動漫」玩家點Say
3D效果一般，環境設計好靚，但人同衣服嘅立體感唔多自然。
可能距離比戲院近得多，我覺得畫面好立體，不過玩一陣就見暈。
唔係好立體，尤其進入戰鬥畫面時，如果武器會飛出畫面就更正。
Profile
平台：PC
類型：MMORPG
製作：中華網龍
推出日期：8月6日
官方網站： http://ten.chinesegamer.net/