在香港踢波維生不容易，靠教甲組搵食就更難，但每季仍有不少球員無懼困難，毅然投身教練之列。前「足球先生」陳發枝在球員生涯為效力球會奪取無數錦標，亦贏過不少個人獎項，只是過去兩季執教晨曦的戰績不濟，差點飯碗不保，降呢做助教；不過，前港隊鋼門范俊業為免錯過擔任守門員教練的機會，不惜提早掛靴，朝着教練工作向前進。
記者：曾雁平 攝影：王子俊
-陳發枝-
出生日期：10/01/57（53歲）
身高：1米73
體重：68公斤
位置：中場、前鋒
教練資格：亞洲足協B級教練
現效力球隊：晨曦（助教）
曾效力球會：元朗、寶路華、精工、南華、快譯通
個人榮譽：香港隊（77-88）香港足球先生（2次：87-89）、香港足球明星（6次：81/82、82/83、83/84、86/87、87/88、88/89)、甲組神射手（2次：87/88、88/89）、香港傑出運動員（88/89）
簡介：兩屆「足球先生」，96年在快譯通結束球員生涯，轉任球隊助教，在快譯通退出甲組後，轉到晨曦任助教，過去兩季與甄力健合作執教。
冇成績教練孭晒鑊
"職業球隊講成績，球隊冇成績，責任一定喺教練身上，今季恢復助教身份，可能係好事，自己覺得唔太適合做主教練，反而從旁協助主教練列卡度較好。家教練確實難做好多，以前球員之間競爭大，好球員又多，球員警覺性同危機感較強，因為操練達唔到教練要求，教練講多兩、三次冇改善，可能已經被淘汰。"
老毛病犯完再犯
"上一代球員，個人技巧同技術比這一代好，主要因為練得多，好似以前馮志明、施建熙等練波之餘，仲會重複做好多底線傳中斬波，家操波比較着重整體，球員好少自己加操，個人技術同技巧性差少少，有時提點球員，過兩日又重複番同樣毛病，有時見到球員咁樣會覺得灰心。"
教波係好高深學問
"足球教練要好高學問，因為既要講心理、體能及戰術，仲要講團結。一隊波有20幾人，有球員有得踢，有球員冇得踢，冇得踢的球員會問點解冇份落場，而點樣平衡同融合球隊已經好考教練功夫，係好高深學問，所以話在香港做球會教練要有夢想之餘，仲要有耐性同心機。"
-范俊業-
出生日期：01/05/76（34歲）
身高：1米83
體重：75公斤
位置：守門員
教練資格：亞洲足協B級教練 現效力球隊：南華（守門員教練）
曾效力球會：流浪、愉園、二合、快譯通、沙田
個人榮譽：香港隊（98-09）、香港奧運隊、香港足球先生（03/04）、香港足球明星（5次：01-06）、最受球迷喜愛的球星（2次：04/05、05/06）
簡介：體院產品，為近年最出色本地守門員，98年開始代表港隊，03年在表演賽對皇家馬德里廣為球迷熟識，在國際賽經常有好表現，上屆從愉園轉投沙田，未能助球隊保住甲組席位。
為前途提早掛靴
"原本想踢多一季，但上季結束後南華聯絡我，問我有冇興趣加盟任守門員教練；其實自己仍有能力繼續踢落去，亦有球會斟介，但既然自己長遠諗住向教練方面發展，加上考慮到喺香港做球員搵錢不會太多，難得有機會，考慮幾個月，決定掛靴，去南華做守門員教練同兼任港隊守門員教練。"
教番前隊友唔適應
"球員生涯好多難忘賽事，好似喺40,000球迷面對星光熠熠嘅皇馬，仲有世盃對中國隊慘敗0:7，但救出鄭智12碼，令中國因得失球差痛失出線席位。守門員來計，34歲年紀唔算太大，今季由球員轉做教練，其實有點不習慣，開操初期帶球員操練自己心思思想操埋，家轉做教練教前隊友，真係唔係好適應，相信要點時間習慣。"
夾在老細同球員中間
"過去幾年曾經兼職執教港青，已累積教練經驗，只係球會教練同代表隊教練始終唔同。喺香港做教練向來不容易，可以話係夾在球員同老細之間嘅中間人，要兼顧兩方面可能要啲技巧。我有信心喺球場上可以幫到球員，至於其他層面可能需要多點時間累積經驗，如遇問題，我會傾向透過溝通去解決。"
特稿
最佳教練所餘無幾
香港足球明星選舉自98至99球季開始增設最佳教練，先後有9位教練當選，不過，9名教練只餘金判坤、陳鴻平及狄恩3位仍執教甲組，其餘不是退居任甲組球隊的助教便是任職青訓教練。
米路最威3度當選
回顧最佳教練名單，以前南華的巴西教練米路成績最佳，先後3度當選，其次是前晨曦教練古廉權，只是米路在07球季帶領球隊完成3連冠後，因與足主羅傑承不和而返回葡萄牙發展；至於古廉權在07球季與晨曦「分手」後，再沒有執教甲組隊，現於車路士足球學校任技術總監。
有一點非常有趣，最佳教練在過去12年原來從未試過有教練能夠冧莊，且看今屆南華教練金判坤能否破宿命。
