大玩車震　要軟要硬靠四波

大玩車震　要軟要硬靠四波

女人升Cup要靠後天加工，但車要升級，就要靠幾個波波！唔好心邪，講嘅係……汽車避震。你可能會話：「汽車避震關個波乜嘢事？」咁你就Out晒！近年潮興嘅氣壓升降避震，利用幾個氣囊將架車升升降降，㩒個掣就搞掂，「震」都要大搞花臣，更可以做到超貼地效果，睇起來又型咗，啱晒鍾意玩新鮮的車主。

記者：趙慧敏
攝影：伍慶泉
Model：Sukmi@Zmodel
鳴謝：AirCruiser（66924611）

氣壓升降　車任舞

經常聽到軟硬避震，大家都會諗起彈弓狀的絞牙避震，要行車舒適當然用軟避震，不過總有車主想享受賽車感覺而用硬避震，但當載住一家大細時，大家要齊齊「頂硬上」，真的攞苦嚟辛！近年香港有改車公司引入美國製的氣壓升降避震，可自己將車升升降降。最過癮是前後輪可獨立調校升降，要仰頭還是升尾，都輕鬆做到，全套裝置約兩萬多元，就可以將部車搞到識跳舞咁！

升降ShowTime

正常

頭輪下降

四輪下降

升降全靠安裝在四輪的橡膠氣囊、高壓氣樽及氣泵，原理與膠波充氣放氣差不多，當車主按着電子按鈕或遙控器的上升按鈕，氣泵便會啟動，高壓氣樽內的氣體隨即注入橡膠氣囊，車身隨即向上升；反之按下降按鈕，氣壓閥門則會打開，加上車本身的重量，氣囊就會自動放氣而下降。

■利用壓縮氣體注入氣囊，可令車身提升。

■在前及後輪安裝氣囊後，可控制前後輪獨立升降。

■一般裝上絞牙避震的位置，裝上氣囊。

■一個小型遙控系統便可控制車身升降。

■駕駛座旁除裝置按鈕外，還有氣壓顯示。

■氣樽及氣泵等基本設備置於車尾廂。

意外遇靚車

今次採訪除見識到氣壓升降避震外，最意外還是作親身示範的一輛美式古典車佳士拿CHRYSLERPTCruiser，這款車於2000年投產，參照車廠上世紀三十年代的Airflow車款，再注入現代元素，由於糅合復古與現代的設計，推出初期甚受歡迎，05年更推出開篷版，其間更推出不同主題的限量版，一度令PTCruiser保持人氣，不過車廠今年初宣佈停產這款車。至於眼前這款PTCruiser屬投產初期版本，棗紅色車身令她增添懷舊味外，車廂設計則保持小房車的簡約風格，雖以塑膠材料為主，但配搭圓形中控台設計，甚具MiniCooper影子。

■圓形的錶板，甚具Mini味道。

■車廂設計偏向膠質，屬小房車格局。

入停車場不刮底

功架攞滿分，攞晒威都要講實用！試諗車裝了貼到地的包圍，當遇上大斜路或入停車場時，可即時將車身升高，咁就避免刮底啦！升高後亦立即變身為SUV，不過記住，如你架車不是越野車，就咪攞嚟上山下海，一小段崎嶇的路面還可應付得來。
講得咁好玩，當然嗱嗱聲跳上車實試震一震啦！先將車身避震調校至中間水平，在一般街道上行車，發覺震動程度亦走中間路線，即介乎硬避震與軟避震之間，避震硬朗之餘，亦不失舒適感。不過還有一點要注意，氣囊放氣後及充氣時，安裝於車尾廂的氣樽會發出雜聲，對要求車廂寧靜的車主，都算幾滋擾o架！

■安裝氣壓避震後，「車震」效果介乎軟硬避震之間。