我求大俠年輕時，好怕睇到一個電視廣告，就係以「唔係最平，唔敢稱霸」打正旗號嘅平霸；仲記得當時廣告入面，旁白嗰個麻甩佬不斷大嗌：「彩色電視，平霸啦！冷氣，平霸啦！雪櫃，平霸啦！洗衣機，平霸啦！電器，平霸啦！」，聽到人頭都痛埋。不過，估唔到時至今日，利物浦新帥鶴臣身體力行體驗呢種「平霸精神」，喺買人方面唔平唔買，最好仲係唔使錢。上周六佢仲重簽咗舊帥賓尼迪斯嘅棄將奧利里奧㖭！
30歲殘兵簽約2年
鶴臣雖然話晒都係一代名帥，教過國際米蘭等大球會，不過，唔知係唔係喺富咸呢啲中小型班取得好成績嘅關係，搞到佢嘅作風唔同晒，喺轉會市場上不知幾咁慳家，繼免費簽咗中場祖高爾同埋以200萬鎊簽咗丹尼威爾遜之後，最新又翻啅紅軍舊將奧利里奧。
30歲嘅奧利里奧喺利物浦4個球季養傷多過踢，聯賽只係上陣咗71場，所以喺上季結束之後，俾舊帥賓尼迪斯放棄；點知喺鶴臣搵兩閘搵到周圍碰壁嘅時候（因為據悉楊格、高捷斯基及美羅費古羅亞都冇乜意思來投），鶴臣就忽發奇想，同利記嘅職員講：「唔知奧利里奧有冇班落呢？不如叫佢返嚟，睇吓佢狀態點樣。」
結果，兩者一拍即合仲簽了兩年合約！呢位巴西後衞話：「今次重簽利物浦同第一次簽紅軍時一樣興奮，希望新領隊領導下一切會煥然一新。」
0:1敗走慕遜加柏
我求大俠唔知道鶴臣之後仲會唔會斥巨資買啲勁人返嚟，但以現時人腳嚟睇，鶴臣呢個平價套餐就確係平，但好唔好食就真係見仁見智嘞。怕且當王牌前鋒F托，喺意大利度假返嚟之後，睇到呢個平價套餐都唔多開胃。另外，利物浦周日友賽慕遜加柏，雖有謝拉特及祖高爾等主力擔正，仍負0:1。