亨泰（197）6月中做主打，股價暫時進賬13%，繼續揸實，皆因唔止睇咁少。亨泰2010年半年度（12月底止）純利搶升80%到1億元，相信隨住祖國消費力引擎啟動，集團主打嘅多元化消費品分銷業，會進一步帶動下半年度業績，兼應該仲有睇頭。但仍然好保守計數，亨泰2010年度純利起個孖，到兩億元。而2011年度，亨泰新發展嘅農務業，相信亦見到成效，提供額外收益，純利亦只係咁意增長30%，到2.6億元，兩個年度嘅預期PE，都係得10.9倍及8.3倍咁大把。
繼續揸住，博亨泰上番1字頭，現價0.77元，要再升近30%。到時，集團目標價嘅2011年度預期PE，仍然講緊得10.7倍，1倍PB多少少，仲係平過場內面其他內銷或內需嘅ChinaPlay一大截。
短打達成博升兩成
達成（126）最新NAV每股2.68元，現價1.05元折讓高達60.8%，呢個折讓水位，仲係未計入集團祖國佳寧娜品牌酒店資產、連雲港大型物流中心（呎價成本20蚊唔夠）及湖南內房項目嘅資產重秤，但折讓已經好吸引。又達成佳寧娜餐飲及酒店業搞得有聲有色，呢個品牌價值，遲早可以透過分拆反映。先嚟轉短打，博達成升20%到1.26元，已經有魚有肉。
錢雋