他們曾經上街義無反顧，只因看到89後的白鴿旗；他們當上「瞓街始祖」無怨無悔，只因認同劉慧卿企硬反對臨立會。22年過去，夫婦滿頭花白，普選未見家鄉，看着曾經一起「瞓街」的卿姐走進中聯辦，跟支持政改方案的群眾揮手，他們一方面覺得詭異，同時又覺得自己是幫兇，「原來唔出聲都係一種罪過、係唔公義，我哋都有份縱容啲政黨唔使睇民意」。
6月中，太陽毒烈，維園阿哥身水身汗狙擊何俊仁，混亂中一人成滾地葫蘆，被警方帶返警署，陪他落口供、驗傷，直到天黑的，只有一對老夫婦。
6.17及6.23，年輕人在立法會外大吹Vuvuzela，輪流在台上執着咪高峯，堅持不要民主黨的退縮方案，又是這對老夫婦。
7.1遊行後，政府總部石屎地上，穿短褲的鍾金勝和太太李衍琉筋疲力竭，大字形躺在地上，睜大眼看星星。
89後成為社運中堅分子
最憤怒的人正是被騙得最狠的一群，又名民主黨的死忠追隨者。
鍾金勝快要60歲，年輕時住在柴灣木屋區，後來徙置到柴灣邨七層大廈，是互助委員會主席。「嗰時巿政局權力好大，好多嘢影響到巿民同街坊。」由那時開始，他醒覺到選舉制度不公平，「嗰時要人工高過唔知幾多錢，同埋有份交稅先有得做選民（巿政局選舉），好似2,000蚊，我20幾歲先有呢個入息，揸住張稅單去登記，嗰時已經唔忿氣，冇理由投票要分階級」。
89民運，李衍琉跟很多香港人一樣，第一次參加遊行，在遮打花園行到灣仔新華社，拿了支聯會的單張，從此成為「支記」粉絲，和丈夫成為社運中堅分子，「張文光有番說話令我好感動，佢話好多人玩過扑儍瓜，玩嘅人得一個槌仔，如果得一個人伸個頭出嚟，佢梗係易扑啦，但係如果個個都走出嚟，佢就扑你唔到。」
不發聲令政黨漠視民意
「以前港同盟、匯點，後來民主黨，佢戙支旗，我哋就去，失驚無神夜晚去新華社坐又去，話乜我哋都去。」鍾太說，即使不滿民主黨的政策，也不會提出，「好似習慣咗由佢哋帶我哋，冇話要啲乜，有啲嘢唔滿意都唔會出聲，好似最低工資、一筆過撥款咁，就算我哋反對出售公屋，都冇出聲」。
「其實佢哋今日嘅局面，我哋呢啲支持者都有責任。我哋都有反思過，覺得自己好唔啱，點解我哋唔出聲？我哋都有份o架嘛，呢個唔係畀唔畀面嘅問題，就算唔夠人哋票多，都起碼出咗聲吖，原來唔出聲都係一種罪過、係唔公義，我哋都有份縱容啲政黨唔使睇民意。」
爭取民主，他們發現不能再跟大佬，只能靠自己身體力行。今年公投，夫婦舉腳贊成；政改爆出民主黨改良方案，劉慧卿的表現最教他們失望，因為96年反對臨時立法會時，鍾生也曾跟卿姐、鄭家富一起「瞓街」，「嗰時成日都瞓，都唔記得，總之好多次，所以嗰幾日喺立法會其實好傷感，劉慧卿不嬲最硬淨，我哋不嬲好欣賞佢，幫佢助選。點解佢會投向大陸？佢話呢啲係黨嘅決定，劉慧卿當年就係唔滿意，先自己搞前綫，佢家咁真係好離奇」。
不停去做至少問心無愧
6.17及6.23年輕人在台上唱歌，他們在台下支持，鍾太說年輕人以藝術方式表達想法，令她很感動，「嗰啲幾多跪幾多拜、蒙眼寫大字『港人治港、高度自治』，好多嘢係講到問題核心，好聰明o架呢班細路，諗到呢啲咁和平嘅方法，喺我心裏面深深留下印象，我哋非常佩服，過往我哋都冇諗到。」
7.1遊行後，兩人不回家，留守政府總部，鍾生希望向年輕人學習，「行咗成10年，次次行完返去食飯，好似行街咁，同行百貨公司有乜嘢分別呢？不如逗留吓，聚集一班人，要求特首見面對話，總好過各自返屋企」。
鍾太接着說：「以前我哋淨係識上街、嗌吓口號，等傳媒報道，跟住返屋企睇電視，冇下文。我哋留喺旁邊，都係支持者吖，順便睇吓呢班細路有乜嘢新鮮搞作，可以見識吓，了解吓佢哋。」
當晚他倆跟其餘七、八人留在大隊邊緣，全部年過半百，最年輕的一個逾40歲，但負責「對付」他們的，卻是三排、每排逾20人的警察。「我哋啲老弱殘兵坐外邊，後面仲有個阿婆，好斯文，自己擔張凳仔，大家都想做見證，睇吓政府點對待巿民，肯唔肯直接對話。我哋有個夢想，曾蔭權既然肯落區推銷政策，我哋喺政府總部等佢出現講幾句說話，唔係過份嘅期望。」
見證的結果是，年輕人不是「暴民」，「邊有衝擊吖，成晚都係好和平，成日話佢哋激，邊度係吖，鏡頭底下一、兩秒，不停喺度重播啫，24小時咁嘅狀態，佢都冇咁好精力啦，佢哋唔係暴民，我可以保證」。
「呢班青年寂寂無聞，犧牲自己時間，議員都可以話為名為利，但佢哋唔係。我自己做過年輕人，對權力都好想挑戰吓，唔係話特登犯法，但係可以進一步就踏前一步，好似設立個示威區畀你，你就乖乖哋喺嗰度示威，從來無同佢講我唔要喺呢度，要去番我應有嘅位置，咁點可以爭取到？」
「人要有理想，我哋希望個制度開放啲，畀巿民去參與，每個人都可以做決策者，改善個社會，我哋會不停去做，做到得為止，就算唔得，至少問心無愧。」記者 張嘉雯