SundayTrip 細細粒Ractis 巨躉任塞

SundayTrip 細細粒Ractis 巨躉任塞

望落架車仔細細的豐田Ractis,原來是巨躉,接近一千公升的大尾廂於夏天更大派用場,約朋友去沙灘玩,塞滿兩個大水泡一個沙灘波,都仲剩大把位。在擁有Ractis的五天中,自然成為貨Van司機,為靚女朋友搬水泡!

記者:許維雅
攝影:伍慶泉
Model:CC

外形夠Kawaii

這五天駕着Ractis,朋友們最感興趣的竟是它的來歷,「咁似Echo?水貨?」事實上大部份日牌車仔都經水貨車行引入,好多人都唔知皇冠車行去年已引入Ractis。日本車仔向來特別得港人歡心,因細細架方便泊車,Ractis由EchoVerso演變而成,女性朋友上車都喊Kawaii呢!

■輕輕一拉椅背手柄向前推便可摺合後座,有987公升儲物容量的尾廂,大把位放雜物。

一手掉頭 正!

向來駕車騰雞的我,亦夠膽駕着它穿梭村屋旁又斜又窄的路仔。輕鬆舒適的操控感覺,無壓力到似玩緊玩具車,平時窄路掉頭總搞到滿頭大汗,最小回轉半徑4.9m的轉向幫我輕鬆一手掉頭。馬力雖只得87匹,但對於駕車新手,易操控的確是增強信心的好選擇,不少朋友坐完順風車後,都有興趣買來作代步家庭車。

■行經多彎窄路,只得1.7米闊的車身令我淡定應付。

1,300mm高度 坐得又放得

Ractis雖屬簡單的玩具車類型,但一樣有三個行車模式,除普通D波,仲有S及B,將波棍拍落S,轉數即提升至3千轉,力量明顯較充足,上斜用就最啱;拍落B波,轉數再升至4千轉,車身明顯更咬地,大雨時用來落斜會更穩。至於內櫳絕對唔逼狹,一坐進車廂,個個第一句就是:「嘩!估唔到咁闊落!」內櫳高1,365mm令車廂空間感增大,再將後排座椅摺起,帶來987公升儲物容量,載大大件水泡都無問題。

■座椅的帆布圖案夠吸引,不用真皮亦可。

夠慳油 Perfect!

試駕幾日,另一令我十分欣賞的,就是儲物位設計又大又實用,還有車仔都有智能車匙及門柄鎖車系統,實用至極。最後試過入完一缸35公升汽油,可以行到450公里,即約$1一公里,貫徹車仔慳油的宗旨。

■波棍設於軚環旁,入波轉波極之方便。

■內櫳鋪排簡潔舒適,米色是最佳選擇。

■兩座中間的儲物格打開後變飲品座,若高些少更就手。

■儲物格特別多,軚環後有一大暗格放銀包最Fit。

規格

引擎:1,298cc直四VVT-i
馬力:87ps/6,000rpm
扭力:116Nm/4,000rpm
傳動:無段變速自動波箱
售價:$169,830(豪華版)
查詢:23054555(皇冠車行)