葉劉愛將陳岳鵬入咗特首辦幫煲呔搞起錨facebook，令佢原來嘅南區區議員議席出現空缺，9月5號需要補選。匯賢智庫早早響朵會搵劉應東接棒，公民黨都篤定由司馬文（PaulZimmerman）出征；雖然只係一個小小區議員席位，但兩黨都不敢輕敵，開始隔空過招。
陳岳鵬曾經以SM造型抗議港鐵喺鋼線灣設置南港島線（東段）卸泥口，佢嘅接班人劉應東都不敢怠慢，近期頻頻就此議題出擊，提攜佢嘅葉劉噚日更加陪住佢，就呢單區內細奀事務身水身汗行上禮賓府請願，呢次補選睇嚟匯賢志在必得。公民黨要後來居上，今日會喺數碼港商場對出空地收集居民簽名。