末代會考生忐忑等到下禮拜放榜，影音使團出嘅雜誌《天使心》訪問咗畢生從事教育工作嘅華叔，希望佢鼓勵吓會考生。
遇到困難不會逃避
訪問刊登在8月出版雜誌，會考生喺試場「作戰」後等成績，79歲嘅華叔則每日都要同病魔打仗，不過佢話自己本人生字典，從來冇出現過「放棄」兩個字，好多後生仔經唔起考驗，慨嘆做人好難，活咗幾十年，身經百戰嘅華叔卻話「活着，難得」。
華叔話面對難關，選擇放棄都冇用，因為始終要想辦法去解決，所以佢遇到困難不會逃避，以佢患癌為例，得悉有病後即時求醫，佢話只有積極面對問題，先可以克服困難。華叔又指年輕人自殺，可能係覺得搵唔到生存嘅希望同快樂，佢認為大家應該想想，快樂係建築喺邊度，不追求物質享受嘅華叔稱，即使佢健康唔好，但仍然感到快樂。
華叔認為人生最寶貴嘅係生命，其他嘢冇咗，仲有機會搵番，惟獨生命只能活一次，勸勉年輕人要愛惜生命，學會愛惜生命才有能力去愛惜其他東西。