「差人搶嘢！」50歲的支聯會常委梁國華，兩個月前在時代廣場外做了80後式的「激進」行為──死攬着被警方及食環署人員強搶的民主女神像不放。其實，相較14年前在天安門廣場上獻花，這一次算不了甚麼。「我唔係勇敢，只不過了咗一個心願。」那一個舉動，差點令梁國華成為第二個劉山青。
一切要從89年6月3日說起。當年29歲的梁國華突然心血來潮，要到與中國類同的地方體驗社會主義生活狀況。他選了蘇聯，由北京乘坐東方快車前往。他訂了6月3日的航班，出發前一晚明知北京「出事」，仍然繼續旅程。結果機上的11位乘客，「一個一個被屋企人call落機」，剩下他與四位日本公司熊谷組員工，「佢哋係去接番啲國民，仲問我點解仲去上面旅行」。
村民擋軍隊 感動加入
落機後在機場酒店住了一晚，翌日準備乘車到使館區申請簽證。「嗰時冇車出，但路邊就有排軍隊，有好多中國人圍住佢哋；有人問我係咪香港人，話政府噚晚殺咗人，唔想畀佢（軍隊）入去再殺人，要圍住佢。」
這一幕令他深受感動，終在當地逗留三天，並成為抵擋軍隊進城的一員。有村民在6月7日跟他說：「你回去吧，將這件事告訴所有人，我們就會好開心。」梁國華將身上所有剩餘物資交予村民，隻身回港，對此事一直念念不忘，「我應承過要為佢哋做啲嘢」。
天安門獻花 公安查問
90年逛年宵，途經支聯會攤位，往事忽然湧上心頭，「我買咗100張揮春同50張書籤，由銅鑼灣派到西環；之後又再去買，去港大派。到第三次去買，同支聯會義工傾偈，佢哋知道我原來買嚟派街坊，即刻問我有冇興趣做義工。我即時應承，仲即刻幫手喺現場派」。
回歸前一年，梁國華有個想法，「好想去天安門廣場行一趟，有啲嘢好想表達」。當時已是支聯會常委的他「驚出事」，特別參加北京旅行團，希望有其他團友「掩護」，結果他成功進京。到了參觀毛澤東紀念堂那一天，他向團友說要去買花，獨個離了隊，拿着花束踏入天安門，走近人民英雄紀念碑，「我一擺低紮花，即刻有公安同便衣上前捉住我隻手，然後拉我上附近一部車盤問」。
惡形惡相的公安指他違法獻花，梁國華卻膽大包天「駁嘴」，「我話如果有人喺城樓嗰邊，想拎紮花過去拜毛澤東而你唔畀，係犯反革命罪；你妨礙我堅持毛澤東思想，更加違法」。公安不防有此刁民，氣得不得了，「佢好嬲，即刻大叫你攞番紮花即刻走」。
看民女被搶 死守不放
公安放人，梁國華即撇，卻在離開廣場前的隧道口再犯險，「放低花、鞠躬，然後逃走，嗰班友已追緊上嚟」。在毛澤東紀念堂等候他的團友，知道他在天安門獻花後個個破口大罵，「佢哋話你儍o架，知唔知有個叫劉山青俾人拉咗呀？我冇諗呢個問題，只係覺得應該做嘅就要做」。97年7月中他再次入境，這一次終於被認出，從此沒有了回鄉證，「我累咗其他叫梁國華嘅人，因為個個入境都被人盤問，我識嘅都有三個」。
今年5月29日，他看着民主女神像在時代廣場被搶，表現十分激憤，「我點可以企喺度蹺埋隻手等佢搬走」。結果他死守不放，高叫「差人搶嘢！」做了96年後另一次好激的行為。他重申民女不是神：「我要保護嘅係一個價值，唔係一個塑像咁簡單。」
記者 許偉賢