無綫兩位當紅兼可能係最搵錢嘅藝人，包括「亞太區最受歡迎香港男歌星」林峯同扮女人扮到出神入化嘅王祖藍，噚晚不約而同開騷。林峯喺紅館演出最後一場演唱會，祖藍就喺伊館開首場嘅talk騷，人氣不相上下。
甘比捧林峯
至於近日醞釀同男友Andy分手嘅睹王千金超雲，都有同男助手捧林峯場，當記者行近時，佢都知道大家用意，即刻話自己心情唔錯，但唔想多講感情事，問佢家係咪單身？超雲話：「當然唔可以話係已婚，但又唔可以話係單唔單身，總之家係冷靜期。」佢話人相處耐咗自然有唔夾嘅地方，好正常。但有傳係賭王老竇何鴻燊唔鍾意Andy？超雲否認，佢仲認同Andy有聯絡，至於有冇機會復合？超雲話：「真係唔知，家大家係好朋友。」連劉鑾雄嘅紅顏知己甘比都撇低囡囡同親友去睇佢，而陳法拉則少有地同Neway太子爺男友薛世恒出現撐場。林峯喺台上話佢會毫冇保留咁演出。
祖藍扮Sammi
另外，祖藍嗰邊都有唔少老友捧場，好似有江欣燕、田蕊妮同鍾景輝等。
祖藍甫開場就以拿手好戲扮女人出現，佢以鄭秀文嘅紅色DeepV造型現身，又一人扮幾把聲。之前傳台灣男友偷食嘅朱慧敏就透露男友專程嚟香港陪佢，仲話佢哋拍拖出街時引嚟唔少途人眼光，仲有人上前問朱慧敏嗰男仔係邊個，而佢即場大騷男友設計兼有佢英文姓氏嘅訂情戒指晒幸福。
