沒有程至美，就沒有今日的吳啟華。吳啟華將鄧特希筆下《妙手仁心》中腦外科醫生程至美一角發揮得淋漓盡致，事業攀上高峯。事隔多年，這對黃金拍檔在亞視新劇《法網群英》再度合作，雙雙倒戈對撼無綫，為的，就是證明自己的實力。 撰文：何慧斯
由《雞同鴨講》的市儈炸雞老闆、到《九品芝麻官》妨礙司法公正的方唐鏡，吳啟華一直扮演着神憎鬼厭的大反派角色。直至他遇到金牌監製鄧特希及《妙手仁心》這劇本，觀眾終於接受他能正能邪的演技。
鄧特希改變人生
事隔多年，吳啟華與鄧特希再度攜手合拍亞視新劇《法網群英》，今次則扮演刑事檢控科高級檢控官方智浩，究竟會否覺得是新挑戰？吳啟華日前在沙田接受訪問時說：「對我嚟講每一個角色都係挑戰，我反而覺得以前做嘅角色仲大壓力，可能我出道多數係做奸角，喺大部份觀眾心目中，我殺人放火好人有限，突然間要我改邪歸正，真係好高難度，你要知道一個人要憎你好容易，但要鍾意一個不嬲唔多討好嘅人好難。」
專演奸角感不滿
毋庸置疑，程至美這角色令吳啟華的事業推上高峯，時至今日，吳啟華仍對鄧特希的知遇之恩心存感激，吳啟華笑說：「佢（鄧特希）直頭將我嘅人生改變咗，一個演員可以喺演藝生涯遇到好劇本，係一件好難嘅事，尤其我由細到大都係一個睇戲好投入嘅人，好憎戲入面嘅奸角，點知自己入行，開頭做親都係奸角，搞到我每次收工都會喺度諗，今日拍戲姦咗邊個、殺咗邊個同埋害咗邊個，嗰時錢又搵得唔多，又要做埋啲唔鍾意嘅嘢，所以嗰段時間真係好辛苦。」
轟無綫冇人情味
提到拍攝《法網》的難忘事，吳啟華說：「有一次我病咗，已經休息咗幾日，我見好啲咪返工囉，點知同事見我面色唔係咁好，竟然叫我走唔畀我拍，仲話好番晒先開工。以前喺無綫拍劇，病都要開工，唔返工又收電話，分分鐘要你即刻「躝」番去，真係好冇人情味，所以嗰一刻真係感到好warm。」
既然認為無綫人情薄，是否終身不回巢？吳啟華說：「我又冇諗過返唔返呢個問題，你知呢一行好難講，可能有一日有個好好嘅角色啱我做，好有誠意叫我返去。」不過即使有好劇本，也要配合湊女時間，年前榮升爸爸的吳啟華，早已為自己訂下時間表，他說：「我一年只係會用幾個月時間工作，其他時間留番陪個女，不過我被動咗好多年，所以係時候主動，我同巫啟賢喺北京搞製作公司，等緊鄧生搞劇本，希望可以喺年尾開鏡，好嘅劇本唔一定搵你，再唔主動就冇得拍，我嚟緊都五張嘢。」
場地提供：沙田麗豪酒店
髮型：VenaLi@BeautyTech
鄧特希：電視製作唔只得無綫
自從08年《法網群英》開拍以來，官司和是非一直圍繞着金牌監製鄧特希，直到現在劇集推出，鄧特希當然希望事情可盡快了斷，令觀眾可以專心留意劇情發展，提到收視，他說：「收視唔到我理，我只係盡力做好本份，呢部戲嘅演員個個都好專業、好投入，我只係想藉住呢個劇，令大家知道電視製作模式唔係得無綫嗰一套，仲有好多其他製作模式，唔好睇嚟睇去都係20年前嗰套製作模式。」
據知鄧特希預備了兩個結局由觀眾決定，問到會否像《妙手仁心》般有一個遺憾的結局？他笑說：「電視劇可以貼近現實，人生唔係咁美滿，所以有啲遺憾劇味可以深刻啲，我只可以話吳啟華要做一個好關鍵嘅決定，而呢個決定會影響佢一生。」
