瑪利諾修院學校異葉南洋杉「鬼樹」，今年2月慘被分屍，沉寃待雪。發展局噚日話，害死佢嘅瑪利諾校方，由08年底至今年初三度喺冇通知古蹟辦下進行小工程，但律政司研究後，覺得校方都係為咗改善校園環境同確保公眾安全，冇損害校內古蹟建築，決定放過學校，唔作出檢控，只係發勸喻信，鬼樹真係死唔眼閉囉！
瑪利諾08年中起被列為法定古蹟，按《古物及古蹟條例》規定，進行工程前要向古蹟辦提供工程資料。校方08年底以蟲患同安全為由斬除18棵樹，去年底為綠化校園種番7棵樹，今年1月進行渠務工程，三次都冇向古蹟辦申請，而渠務工程更損害鬼樹根部，令佢難逃一斬。古蹟辦要求校方落實改善措施，加強與工程公司溝通，認清條例規定及許可證事宜，改善校內工程嘅監督安排等。