暑假還有一個月,小朋友的暑期課程接二連三,天氣熱,最爽當然是走到凉浸浸冰面學溜冰,既可訓練平衡力同強化肌肉又可避暑,羨慕嗎?跟囝囝囡囡來個親子溜冰又如何?
記者:梁美甜
攝影:梁細權
小腳板溜冰練大力
「溜冰是全身運動,基本上由3歲到成年人都可以參與,學溜冰會由基本開始,好似一些踏步動作、前後滑行、前後繞行等等簡單動作,都可以訓練到小朋友的平衡力,轉換重心的應變及適應能力同反應,更可以鍛煉雙腳的協調呢!」飛龍溜冰學校的溜冰教練Hermas解釋道。
手拖手溜個夠
爹哋媽咪可以放手站在場邊看囝囝囡囡上堂學習,也可以選擇參加親子班,與他們手拖手上堂,參加親子班的三對均是媽咪連小朋友,三對都是生手,一看就知不懂溜冰,最有趣是,哪個媽咪大膽行大膽滑的話,尾隨的小朋友也跟着大膽試,「就算兩個人都唔識溜冰,大人都一定學得快過小朋友,因為佢哋雙腳肌肉力量、協調同平衡都比小朋友強;最重要是小朋友都信任媽咪,跟住媽咪做,佢哋信心都大啲!」Hermas笑說,「親子班除咗促進兩人關係之外,好多時大人記性無小朋友咁強,一下子忘記了之前學過嘅動作,反而小朋友可教番轉頭呢!」
飛龍溜冰學校(23079365)
深水埗西九龍中心8樓
學花式踏舞台
除了一般的溜冰課程之外,不少場地也會開辦一些花式溜冰班予小朋友學習,「花式溜冰難度更高,要求更高嘅靈活度同體能。」MegaIce溜冰學校溜冰教練蔡Sir解釋道。「花式溜冰好多時要喺限時入面不停跳動,運動量好大,要好夠氣同好大體力,肌肉要發達夠力至可以支持大量彈跳嘅動作,無論係專注力、身體靈活度同埋自信心都會大大提升。」不懂溜冰也可以玩花式溜冰嗎?「可以,基本上無論係一般溜冰或花式溜冰都好,初學都要學習一連串基本動作,好似可以點樣安全跌、先後滑行、踏步之類嘅動作,只係年紀輕本身又有芭蕾舞底子就會快啲上手,提腿、手腳擺動等花式動作會較易處理得到。」不過,對一眾家長來說,最吸引的是小朋友在課程完成後,有機會參加《冰上魔幻劇場》畢業表演,做表演兼攞畢業證書,暑假充實外,父母更覺自豪。
畢業表演《冰上魔幻劇場》
日期:今日
時間:5-6pm
地點:MegaIce
MegaIce(27094020)
九龍灣宏照道38號megaBOXL10