陳木勝的電影動作場面寫實，但他謂不等同搏命。論玩命他坦言遠遠不及當年的電視年代，兩個武師揸住支AK47，沒有申請便膽粗粗跑過彌敦道，沒有遇着警察駁火已經萬幸。現在一切都依足規矩，好玩程度肯定無當年拍《衝鋒隊怒火街頭》般過癮，但他執導的電影《全城戒備》仍不乏上天下海等玩命鏡頭，女主角舒淇也不禁慨嘆：「唔明點解拍戲要咁危險！」
撰文：何永寧
很多人詬病港產片收買人命的拍攝方式：「拍戲啫，使唔使搵命博呀？」擅拍動作，逢片必有爆破場面，拍得陳木勝的電影，差不多都預了會有危險，曾與成龍合作無間的陳木勝日前接受本報記者專訪時說：「我拍嘅戲係會有危險，但唔係玩命，玩命係一般人誤解，唔了解我哋運作。」
陳木勝指身邊很多指導跟武師都曾經去過荷李活闖，他說：「大家set一套吊威吔設備去用，我哋半粒鐘搞掂，荷李活班人要兩個幾鐘。因為快，佢哋覺得我嘅唔安全，會話『得唔得o架？』事實證明係work。好似港式動作有種叫翻撻落地，即係高台撻落地下，我哋覺得好普通，佢哋就會覺得好唔人性。其實內裏點樣卸力同落地都好有學問，佢哋唔識至覺得搵命博，或者話荷李活人未到嗰種境界。」
揸槍跑彌敦道最過癮
當科技跟金錢不及別人時，這類被視為土法的拍攝手法，就伴隨香港人成長，更足以令港片發揚光大。陳木勝說：「如果荷李活電影係用金錢同科技堆砌，地道港產片就係靠技術去彌補呢方面不足。」陳木勝強調演員並不是儍瓜，他說：「拍戲危險一定有，但演員都唔係儍。一陣爆炸呀，咁唔通陳木勝叫你企喺度話冇事你就企喺度，佢肯企喺度係基於大家長久合作建立嘅信心，團隊嘅武指、動作指導又畀到演員安全感至得。」他強調拍其電影的演員辛苦是必然，但也是好玩的地方。
陳木勝笑言最無法無天的是20多年前的電視時代，他試過拍亞洲電視《皇家檔案》的一場打劫戲時，去到現場就叫兩名武師戴着頭套手持道具AK47，在光天化日之下跑過尖沙嘴的彌敦道。他回想起來也覺得過癮，還笑言自己當年的輕狂，他說：「唯一所謂安全措施咪得兩個武指，一頭一尾舉起個牌寫住『拍戲』，如果有警察行過開槍，真係唔知點收科。」到拍電影《衝鋒隊怒火街頭》，他更試過在沒有申請的情況下在鬧市爆破，令他多次被政府列入黑名單，更因而不能借用場地拍攝，他說：「唔係唔想做，係冇得你申請。」
忽擁異能如一夜暴富
當年拍完《衝鋒隊》之後，嘉禾老闆之一的何冠昌看完試片，即拉住導演陳木勝說：「你以後就拍呢隻戲得嘞！」陳木勝自細看李小龍及港式動作片長大，拍動作戲自然是夢寐以求。他對警匪動作有一番憧憬，到現在仍未想過跳出這個框框，他說：「今次《全城戒備》就玩超現實，加入好多特技同CG，但係本質都係港式動作。」
其實今次陳木勝除了玩特技，還希望借變種人去探討人性。他構思當一個人忽然有了超能力時，就好像普通人一夜暴富，要如何去駕馭這種能力，就是他想探討的問題，他說：「就好似戲中郭富城同鄒兆龍喺得到能力之後各走極端，證明人之所以變，在於佢嘅本質，同能力冇關。有錢之後有人會行善，亦有人會行惡，都係一念之間，錯不在金錢本身。」
四大玩命場面
拍戲使唔使搵命博？《全城戒備》應是郭富城入行以來最搏命大膽作品之一，以下四個是戲中最驚心動魄的場面。
公海餵鯊
劇情講述變形人之一的城城被鄒兆龍拋落公海，城城謂因為近黃昏，是鯊魚活躍的時間，他說：「除咗鯊魚，嗰度係大船航道，好易形成漩渦。海面睇嚟風平浪靜，但係一拉咗你落去就上唔返嚟，玩開潛水嘅人都知好危險。」
吊高10層
戲中變形人均擁異能，上天下海在所難免，故有大量吊威吔場面，演員需親身上陣。為求突出效果，不時要出動大型吊臂車，演員被吊到10層樓高。其中舒淇更要在半空中跟城城有交接鏡頭，稍一不慎便粉身碎骨。
隨時炸傷
其中一幕鄒兆龍跟城城在一鐵籠內對決，籠內裝有過百粒反應彈。試戲時只用了一粒，已令到一名試位的特技人被灼傷。正式埋位時，鐵籠內過百粒反應彈同時爆炸，城城自言拍攝前驚到汗流浹背，不過仍然要頂硬上，幸好吉人天相。
飛越車頂
城城在20至30部行駛的車群中，吊威吔追殺鄒兆龍。在眾多移動中的汽車頂車過車，他既要演戲又要吊威吔，稍一不慎便會湮沒在車陣內。舒淇也要在貨櫃車頂上追逐，賴以保命的就是一條威吔，難怪她笑說：「唔明拍戲點解要咁危險！」
《全城戒備》故事：小丑突變異能人
Sunny（郭富城飾）是雜耍表演團裏的小丑，一次偶然機會下，他跟大初（鄒兆龍飾）及四名團員深入大馬山區盜寶。其間六人發現一個洞穴，內藏二戰時期日軍遺下的生化氣體。眾人吸入後，筋肉骨骼出現獸化現象，體能也提升，惟獨Sunny除身手變得敏捷外，卻沒有獸化現象。大初等人利用異能接連犯案，警方請來武功精湛的內地專家孫皓及秀華（張靜初飾）跟進。另外，剛被降職的新聞女主播Angel（舒淇飾）對Sunny等人的變化大感興趣，希望憑此發掘出大新聞，為自己挽回名聲。
舒淇城城十年風雲
經過十年沉澱，《風雲》中擁有麒麟臂的郭富城跟舒淇演的楚楚，到新片《全城戒備》城城變成具有超能力的變種人，舒淇也搖身成為女主播。
十年後再次合作，舒淇認同身邊的城城是個更有要求的人，當年那份濃得化不開的偶像味，已經變得若有若無，她說：「城城更加知道導演會要啲乜，對電影嘅要求更加多。相信多咗呢十年嘅經歷，人生嘅閱歷對演技好有幫助，更容易去掌握角色。」
城城：佢廣東話可以好啲
城城覺得舒淇的轉變更加明顯，他說：「人成熟咗，磨練多咗，對於臨場發揮更加有把握，戲由心而發，不過廣東話應該可以再好啲。」曾和陳木勝合作《三岔口》而奪得金馬影帝，城城認同拍他的電影辛苦，他說：「上次要跑橋，今次就要不停換妝，淨係一個肥人化妝已經要化成五個鐘，拍咗十幾個鐘之後卒之頂唔順敏感。」對於小丑造型被指抄襲《蝙蝠俠：黑夜之神》（TheDarkKnight），他說：「個個小丑都係咁樣。」
