位於機場嘅亞洲國際博覽館呢個周末被一眾小動物攻陷，原來係噚日起一連三日舉行嘅全港最大型室內動物農莊嘉年華「親親動物農莊」，小妹見到啲小朋友玩到喪晒。農莊嘅PR姐姐佩瑩同小妹講，全場有超過一百隻小動物同大人小朋友近距離接觸，真係好難得嘅機會，佢哋唔玩到喪晒至奇。
另有國際寵物用品展
佩瑩姐姐話，小朋友可以親手餵飼大小山羊，親親賓尼小白兔，以及近距離觀賞大烏龜等，而每個動物區內仲有專業動物導師駐場，為參觀者提供導賞及講解動物習性。小妹現場所見，啲女仔最鍾意抱小白兔同餵山羊，男仔就鍾意騎馬仔。
佩瑩姐姐又話，現場唔只有動物睇，仲有星睇。好似「親親動物愛心大使」衛蘭、官恩娜等即場表演兼同觀眾玩遊戲。今日仲有專為細路仔而設嘅ArtJamming藝術繪畫坊、巨型吹氣彈床、烹飪班。門票分兩種，$40嘅「吃喝玩樂套票」，包入場券同一份動物飼料及餐飲遊戲現金券；另外一款「全天候玩樂套票」，成人價$120，小童價$70，額外包埋昂坪360來回纜車券（標準車廂），詳情瀏覽 http://www.asiaworld-expo.com/happyfarm。
睇完動物再睇寵物，同一時間亞洲國際博覽館舉行國際寵物用品展暨水族博覽，活動包括全犬種冠軍狗展，同埋冠軍貓展。睇完貓展狗展，再睇埋犬隻服從比賽、寵物美容比賽同寵物造型比賽，咪帶埋自己隻愛犬到狗狗咖啡室嘆下午茶囉。入場券（連同寵物）$25，詳情瀏覽 http://www.asiaworld-expo.com。
電郵：mailto:[email protected]