愛國愛黨社團、政黨搞超筍旅行團益街坊，幾十蚊位遊香港、食海鮮、喫蛇宴司空見慣，呢啲小恩小惠近日變本加厲，八方發現有政黨竟然引入零團費，更離奇嘅係搞零團費旅行團嘅，並非有阿爺無限量支持、要風得風要雨得雨、財雄勢大嘅民建聯，而係成日呻窮嘅白鴿黨。
自從阿珍被踢爆鬧人劏客，政府正想辦法杜絕零團費旅行團，估唔到政黨反而帶頭搞零團費。其實政黨為咗籠絡街坊，一年到晚舉辦唔少旅行團，由於呢啲着數團都係有政治目的，不求賺錢只望回本，因此本地團一般收費一百幾十蚊一位，搞到零團費可能係創本地政壇先河，真係幾令人側目。
齋遊立法會冇飲冇食
呢個零團費團由白鴿黨主辦，上月底成行，得一個行程，就係參觀立法會，最令人驚奇係民建聯舉辦同樣行程街坊團，都要收30蚊一位，白鴿黨今次成功爭取零團費，相信係歷史性紀錄。負責搞團嘅羅健熙稱，呢次零團費街坊團招待廿幾名街坊來回香港仔、中環，租車成本450蚊，冇飲冇食，由於唔係好多錢，所以索性免費全數貼畀街坊，佢話反應幾好，正考慮搞多次。上述零團費由白鴿黨議員甘威做導遊，帶街坊參觀立法會大樓。
至於民建聯舉辦嘅同樣行程街坊團，點解要收30蚊，而唔係零團費呢？有人話可能係要補番上次幾十蚊海鮮團條數，否則次次蝕本，民建聯都頂唔順；亦有人指民建聯可能包埋飲早茶嘅點心、茶錢，因為街坊要喺鴨脷洲邨誠信酒樓旁邊集合。
內地人參加零團費旅行團，無良旅行社、導遊話，貪便宜者應該有心理準備被劏，好似阿珍咁講，呢個世界怎可能有免費午餐？政黨又不是做慈善，至於攞咗嘅着數幾時要還，八方唔清楚，總之這輩子不還，下輩子也要還出來，即係好似白鴿黨咁樣，大家同佢坐埋一條船，爭取民主咁多年，結果佢哋就整咗個區議會方案出嚟，一鋪過劏晒全香港人。
mailto:[email protected]