關楚耀算是攝影初哥，數年前，年輕人開始流行拿着數碼相機周圍影，看到別人東影西影，他十分好奇。有次與朋友飯聚，隨便拿來玩玩，一試便興奮，他說：「個朋友用manualmode，快門、光圈全部都係由自己控制，調校唔同嘅快門、光圈，影出嚟嘅相會有唔同效果，覺得好得意。」
關楚耀更發現，只要專注影相，可以令自己忘掉煩惱：「因為影相時，你專心一意要留意環境，影乜嘢角度，用幾多光圈，影動態嘢時，快門又係幾多……，嗰一刻會令我忘記煩惱。最重要係，當自己捕捉到一個重要moment，影到靚相好有成功感。漸漸影相就成為我生活一部份。」 撰文：王連連
神清氣爽
「晨早空氣清新開朗，陽光溫暖帶來無限美。香港節奏急速，個個人行路都特別快，壓迫感好大。清晨時分人唔多，只係聽到雀仔聲，好似去咗另一個世界，好似返咗加拿大。」
雨過天青
「以前最怕落雨，地面濕滑，好多活動都做唔到，但落完雨，太陽再出來，街道會特別清麗，所以每次我都好期待呢一刻。就好似人要有希望一樣，展望未來，Everything'sgonnabefine！」
天燈許願
「早排我去台灣拍MV，見到當地人放天燈，睇住啲人將願望好用心咁寫完，就將個天燈放上天，雖然唔知係咪會實現，但係我都許咗願！」
規行矩步
「幾條線就可以將世界上好多事物劃分得規規矩矩，好似馬路雙黃線就唔可以停車、雙白線就唔畀cut車……好簡單，大家見到就知規矩。」
時光隧道
「我講求速度，當架車好高速，睇住身邊嘅嘢好倒退咁，就覺得架車喺度衝呀衝。尤其喺隧道入面，好似有種衝過時光隧道嘅感覺，哈哈……好似坐緊多啦A夢嘅時光機！」
綠色生活
「喺台灣見到呢間屋真係好靚，唔知用咗幾多時間先種到咁多蔓藤攀住啲石牆呢？將來如果我有間屋，可以佈置到咁都好。望多啲綠色植物對眼好o架。」
心花怒放
「喺香港要過新年至可以放煙花，但台灣就唔同，嘩！佢哋真係玩得好開心，每次一爆開煙花，就聽到啲人大叫，真係會好熱鬧、好開心。」
幕後功臣
「以前見到人哋幫我做野，唔會有特別感覺，但經歷咗咁多嘢，知道所有嘢得來不易，機會唔係時時有。見到呢班攝影師，為咗我拍MV，個個都幹勁十足，出咗好多力，好多謝佢哋。」
