39歲的黎姿上周六為富商丈夫馬廷強剖腹誕下孖女，留院一星期後，昨日她在逾10名保鑣護航下出院。產後首次露面的黎姿雖然身形腫脹且谷奶升cup，但精神飽滿兼笑容滿面，她透露體重逾六磅的大孖已被送返家中，至於現時重約四磅的細孖則仍需留院，因而令她十分掛念，又指只要身體狀態許可，必定親往醫院探望細B。
黎姿上周六在舊山頂道嘉諾撒醫院剖腹誕下孖女，其53歲夫婿馬廷強當晚親自向傳媒報喜，指大孖重六磅多，細孖則重三磅多，太太兩至三日後便可出院，結果黎姿卻要留院一周，據知是因她開刀取孖B傷口較大，其次是細孖要瞓氧氣箱，她不捨細B故留院多幾天。
夫派逾10保安護駕
馬廷強日前曾指細孖足五磅後便可接返家中，其後無綫高層樂易玲指細孖體重已達四磅，不過昨日仍未能隨母親一起出院，黎姿始終初為人母，即使昨日出院返家也難免心繫細女。
黎姿產前體重勁升達180磅，產後的她昨日淡掃蛾眉首次亮相，現場見她精神飽滿，但身形仍然腫脹，胸部因谷奶升cup，令穿白色低胸裙的她更見身材出眾，她頸上戴着十字架鑽鏈，但沒有戴上鑽戒。雖然馬廷強昨日沒有現身陪太太出院，但安排了10多名保鑣在場維持秩序，樂易玲近3時到達醫院，未幾黎姿便由樂易玲、護士及保鑣等陪同下步出醫院正門，接受在場半百記者訪問。
笑容滿面的黎姿先主動向記者說：「大女返咗屋企，細女要遲啲。」BB飲人奶還是奶粉？她說：「兩樣都會做。」
細女仍要留院，黎姿豈非要寓所醫院兩邊走？她即說：「身體狀態可以嘅話，我會返嚟睇細女，因為我太掛住。」BB是否已改名？她謂：「暫時未，呢啲一切由我先生負責。」
暫未考慮追多個仔
訪問期間黎姿一直笑不攏嘴，即使身邊護士欲拉她上車，黎姿也繼續逗留受訪，問她會否追多個囝囝時，她笑說：「暫時未諗住。」她又透露丈夫已在家中湊大孖，至於會否與家人用膳慶祝孖B出世？她只說：「我哋都要食飯嘅。」其胞弟黎嬰是否已見過孖B？黎姿說：「未住，遲啲啦，多謝你哋，辛苦晒，你哋咁多日等我，唔好意思。」
之後黎姿在一眾保鑣護送下登上價值約140萬的黑色寶馬名車，再在保鑣車護航下直返蘭心閣豪宅。
此外，黎姿前男友黃玉郎昨日現身會展動漫節，問他知否黎姿生BB及會否戥她開心時，他一概避談，只說：「私人事唔講啦。」
採訪：藍文浩
攝影：楊浩賢、彭琮然
相士話：天生富貴命
黎姿上周六（24日）誕下孖女，堪輿學家楊天命昨指當天是財氣日，馬家孖女一出生便旺父母，尤其旺父，是天生有錢人命，小時候已行讀書運，一生行不到剋夫運。又指孖女生於夏天，姓名中宜有水字或三點水。
堪輿學家麥玲玲卻指孖女屬木，生於熱天的木要有水，兩女命水已夠，宜有更多木，改名以草花頭或木字旁較佳。她指孖女與母親感情甚佳，一生平穩向上，讀書叻，有機會出國升學，將來可做律師、醫生及專業人士。雙生兒命格相近，但算命以一人為主，兩人對分，命運軌迹相同，但稍有分別。大孖較具家姐風範，細孖較精靈及牙尖嘴利。
娛樂資料庫：孖仔孖心肝
去年結婚的黎姿，日前為丈夫誕下一對孖女，其實不少明星名人也曾生過雙胞胎甚至三胞胎。
湯鎮業 與前妻姜坤育有一對孖仔，現任太太鄒文靜於08年誕下孖女。
翁為德 2003年在美國為丈夫鄒兆龍誕下孖仔，大孖取名昊駿（Kian），細孖叫昊曦（Kaden）。
鄧梓峰 孖仔松暉（Justin）及柏暉（Matthew）於98年出生。
張之亮 其妻於95年為他誕下三胞胎，長子英名文叫Eugene、二子Matthew及幼子Jeremy。
陳婉珍 三姨太於90年為賭王何鴻燊誕下龍鳳胎超蓮及猷啟。（左圖）
何琍琍 76年誕下孖女趙式平和趙式和。（右圖）
梁洛施 上月底為男友李澤楷誕下孖仔。
吳家樂 太太周蕙蕙於08年為他誕下孖仔。
林建岳 前妻謝玲玲為他誕下一對龍鳳胎。
資料來源：《蘋果》資料室