前朝早扭開收音機聽番中午收市前大市走勢，遇上當日因進入大摩MSCI指數而起跑嘅農業銀行（1288），股價正上衝向當日高位3.60元進發時，傳來熟識嘅聲音，話隻農行其實係好嘢嚟嘅，仲話ROE有20%，PB都只係1.7倍，係出面有股評人冇睇過招股書，至不識好歹覺得佢質素低買唔過。
唔只講過一次，新股不離炒供求，農行既然咁正咁靚，點解招股時唔可以上限定價？上咗市10日至較招股價升11.5%就叫做叻，見八連陽就也文也武！
中國銀行業於上世紀90年代以來，一直都背負大量不良貸款，政府為改善商業銀行資產質量、充實資本基礎採取多項措施，包括98年財政部發行2700億元（人民幣．下同）特別國債，以補充四大商業銀行資本金。99年為深化金融系統改革，中央成立咗4家政府全資控股嘅金融資產管理公司（AMCs），接收、管理同處置四大商業銀行不良資產。
01年中國正式加入世貿，中國銀行業開始逐步向外資金融機構開放。08年農行股改前，滙金注入約190億美元，令不良貸款比率由23.57%大降至4.32%，擺明又係打咗Botox至出得嚟見人。
農行風險過份集中
須知整容最大開支唔係整第一次嗰筆，而係日後要定期維修嘅費用，眼見國有商業銀行上咗市幾年貨仔就要再伸手，通通患晒整容後遺症，竟然仲獲得無數讚美，唔通習非成是又係中資銀行嘅特色？
根據農行招股書內風險因素部份嘅資料，09年底向西部、中部及東北地區發放之貸款餘額，合計佔該行貸款總額36.8%，其中不良貸款餘額合計佔不良貸款總額達50.7%，明顯係風險過份集中。大家最關心嘅住房按揭貸款則佔該行境內個人貸款餘額63.1%，唔算分散。仲有，09年農行之股東權益回報率為18.96%，唔係20%。
胡孟青
獨立股評人