華爾街大行高盛近年形象插水，為咗挽救頹勢，最近有個新政喎！就係要旗下超過3.4萬個交易員、賓架同其他員工，做返個溫文爾雅嘅金融業從業員，喺email、SMS同網上傾偈，都唔可以用「粗鄙」嘅用語（即係naughtywords），仲要嚴到打粒「*」代替都唔得o架！使唔使咁嚴呀？梗係啦，高盛唔想再畀美國證監同啲議員搵到高盛員工嗌啲產品做「sh**tydeal」嘅痛腳嘛！
雖則無白紙黑字寫到明大家有咩唔可以講，但據講公司會出動新嘅審查軟件，過濾晒email入面嘅粗鄙用字。高盛發言人話，雖然犯規者應該唔會有特定懲罰，但屢錯不改喇喎……有可能被老細照肺囉！之不過咁，斯文，都可以係敗類；唔爆粗，又未必係好人嘅！
講開又講，高盛今年真係衰開有條路！早排雖然就一宗涉嫌欺騙投資者嘅民事訴訟同美國證監達成和解，賠咗5.5億美金了結咗件事，但搞掂左證監一單，「蘇州屎」好似陸續有來喎。據講高盛家仲要應付至少18宗投資者發起嘅相關訴訟。唱好高盛？睇怕都唔係咁早囉！
李華華
mailto:[email protected]