曼聯噚日朝喺美國侯斯頓大炒美職聯明星隊5:2，相信領隊費格遜都滿意球員嘅演出，但係佢哋嘅保加利亞前鋒貝碧托夫就斯人獨憔悴喇，事關有傳佢個唔生性嘅細佬懷疑俾黑幫綁架，搞到佢坐立不安，為搵細佬而煩惱，唔怪得噚日朝早場波佢冇份踢啦。
細佬黑底一身屎
英國傳媒日前爆料，貝碧托夫嘅23歲細佬雅辛同佢太太美美，喺保加利亞開時裝店，但就失蹤咗成個月，打極手機都冇人聽，貝碧懷疑佢俾當地黑幫綁咗，而為咗雅辛嘅安全亦唔敢報警住。保加利亞南部城市布拉戈耶夫格勒嘅警方發言人咁講：「我哋未收到有人報警，唔可以展開調查。」
我求大俠收到風，雅辛本身好有問題，除咗欠落一身街數，仲因為假卡詐財案而俾警方荷槍實彈闖入屋，帶走佢幾部電腦同一堆文件以作調查。另外，佢亦好鍾意賭錢同埋吸食可卡因，結果搞到同貝碧反晒面。一句講晒真係好人有限，但貝碧同佢始終係親兄弟，你話唔擔心就假。
人怕出名豬怕肥，貝碧係保加利亞最top嘅足球員，身家閒閒哋過千萬鎊，所以唔少人都想打佢主意。舊年就有傳黑幫想綁佢屋企人，然後勒索佢50萬鎊，好彩佢收到風閃得快先逃過一劫。因此，有指雅辛今次失蹤，最終目標都應該係貝碧，想屈佢一筆。但係，雅辛佢衰到冇人有，亦唔排除串埋街外人昆貝碧。
紅魔友賽炒美職明星
講開噚日朝場波，曼聯喺美洲之旅尾二一仗精銳盡出，雲達沙、布朗、莊尼伊雲斯、奧沙、傑斯、費查同拿尼等全部正選，結果憑馬捷達梅開二度，同埋吉遜、卡華利及新簽嘅「小豆」查維亞靴南迪斯各建一功，大勝美職聯明星隊5:2，賽後老費仲大讚同貝碧一樣係打前鋒嘅馬捷達同「小豆」㖭。其實貝碧喺美國之旅表現唔錯，如果因為細佬單嘢而搞到狀態跌番，影響佢喺曼聯嘅發展，咁就認真唔抵。