今夏喺轉會市場最多動作嘅，相信英超嘅曼城認咗第2，都冇人敢認第1，聽講佢哋仲會喺24小時內公佈意大利前鋒巴洛迪利加盟。而英國博彩公司stanjames就開出咗一個曼城特別賠率，估中曼城喺8月14日英超開鑼戰作客熱刺嘅正選11人，賠率有26倍。雖然賠率好分，不過難度都好高，因為曼城家嘅大軍名單已膨脹至40人，而喺周三對阿美利加場友賽，連上季季尾肩傷長唞嘅門將基雲都復出埋，仲撲出咗兩個12碼，協助球隊互射12碼勝出，咁你話幾難估曼城邊11個正選嘞！話時話，基雲今次復出，對英格蘭年輕門將赫特嚟講都咪話唔係壞消息，因為佢一心諗住由伯明翰返嚟，可以穩坐門將第一把交椅o架！