上星期四黑雨將大埔沙埔仔村冲到散晒，事隔唔夠一星期，噚日又黑雨，村民未收拾好家園，又要面對暴雨，真係好凄凉，馬會噚日宣佈動用「賽馬會緊急援助基金」，向受水浸衝擊災民每戶撥捐三萬元，而喺上星期水浸時不幸去世嘅林先生家庭，則獲四萬港元援助金。
呢次係繼年初馬頭圍塌樓事故後，馬會再次發放緊急援助金幫助災民，馬會慈善事務執行總監蘇彰德話希望幫到沙埔仔村民暫解燃眉之急。民建聯立法會議員陳克勤噚日黑雨期間都緊急出動，去到沙埔仔村視察，村內四處係水，多到佢抽唔晒，佢話之前阻塞河道嘅石頭同淤泥，大部份已清理，承建商會派員喺村內24小時候命，需要時會即時疏通河道。