政改方案成功起錨，特首煲呔心情興奮到飛起，噚日出席香港電台節目，為末代會考生打氣。有考生話希望同煲呔同舟共濟起錨為香港做好事，煲呔冇嗌起錨，同考生一齊放紙飛機，象徵夢想起飛。
噚日下晝黑雨警告，煲呔到場時笑言好彩早5分鐘出門口離開禮賓府，否則掛起黑雨，負責保安嘅人員就唔畀佢出門口。原來黑雨咁危險，特首都要停工，政府應該快啲立法准打工仔黑雨時早啲收工啦。
自嘲民望持續下跌
今年係最後一屆會考，亦係煲呔最後一年以特首身份為會考生打氣，因為要到後年先有首屆中學文憑試考生放榜，屆時已改朝換代，煲呔唔係特首。佢噚日心情輕鬆，指會考生分數一年高過一年，同佢嘅民望持續下跌成反比。
噚日有200幾個高考、會考生在場，八方相信都係經過主辦單位精挑細選，所以冇社民連支持者同煲呔唱對台，冇任何掟咪、怒罵場面，難怪煲呔輕鬆到可以玩自嘲。被形容廢廢哋嘅特區政府，在政改方案過關後，已經冇乜大事要緊急處理，真正奉旨「廢廢哋」，煲呔去完澳門拜祭外父，又去四川抱大熊貓，今日起開始放大假至8月7日，其間由財政司司長曾俊華同政務司司長唐英年，輪流署理行政長官職務。
特首辦稱煲呔放大假時會離港，至於去乜嘢地方度假，官方冇透露。據八方了解，煲呔早前去四川視察同抱大熊貓之前，原來已經北上，唔係去長線團，近近哋短線玩吓，去咗順德。
放大假去順德搵食
呢趟順德行，煲呔夫婦同幾個前朝行政局成員同行。原來煲呔不時同老友去順德搵食，正所謂食在廣州，廚出順德，順德係粵菜發源地，又被稱為中國三大廚師之鄉之一，煲呔果然識食，之前曾經同東亞銀行寶哥哥去勒流食海鮮，據講當地唔少食肆都有貼出煲呔幫襯照片作招徠，日後佢唔做特首，有潛質轉型做食家。
mailto:[email protected]