黎姿剖腹生咗孖女，噚日仲留緊院，無綫高層樂易玲去旅行返嚟，第一時間去醫院睇BB。樂小姐話黎姿胃口好好，BB女情況好好，雖然細孖仲瞓緊氧氣箱，已經有4磅重，但未出得院，所以黎姿都唔出院住。樂小姐仲話：「我冇抱到BB呀，摸吓佢哋腳仔咋，兩個都咁靚，眼同眉似媽咪，耳同下巴、嘴仔似爹哋。」至於改名，黎姿想等囡囡大個啲，知道性格先改，到時再一齊改英文名。