上海世博開幕到家都差唔多3個月，截至上個禮拜三，入場人數有成3000萬人次，差唔多每日有37萬人，最高峯嗰日好似話試過55.7萬人次㖭！不過，上海海外聯誼會會長楊曉渡噚日話，當局心情相當矛盾。點解呢？
楊會長話，原本上海世博當局理所當然咁諗，多啲人入場會熱鬧啲，但又擔心人多會有意外；家啲飛已經賣咗5000萬張，即係仲有2000萬人買咗飛但未入場，搞到佢要呼籲呢班人及早遊園，唔係到時真係分分鐘逼過開幕嗰陣呀！
世博有驚都有喜嘅，好似楊會長就高度讚揚上海市民對世博嘅支持，事關早年大興土木時沙塵滾滾，試過同一時間有成200個工地施工，市民仲要每日花多粒幾鐘搭車返工放工。換轉香港，你估香港人會唔會嘈到拆天呀嗱？
李華華