應屆10位港男噚日喺尖沙嘴出席型男活力大比拼活動，大會安排佢哋攀石爭奪型男活力獎，結果由10號翟威廉勝出。
龔嘉欣讚男友
由於眾男下身要戴安全帶，所以大多數都做咗現袋男，翟威廉仲不慎雙丸現形，頗為不雅。至於影過疑似沙灘裸照一字馬嘅5號白健恩，噚日使出一招單腳一字馬，贏到唔少掌聲。
同場嘅龔嘉欣近日傳同鄧健泓拍拖，噚日佢承認大家發展緊，又大讚鄧健泓係好男仔、好細心同埋好錫佢，仲見過男方家長㖭。如果喺公司遇到男友嘅舊愛李詩韻，會唔會尷尬？龔嘉欣就話：「我唔識佢，大家都好清楚個次序，又唔係一腳踏兩船，總之各有各嘅生活。」
娛樂圈嘅男歡女愛不嬲好戲劇性，除咗龔嘉欣外，港男4號葉建希嘅媾女戰績都勁彪炳，早排佢承認對港姐10號馬鈞怡有好感，原來佢已經有實際行動，仲喺blog上張貼兩人合照，其中一張相馬鈞怡擘大口扮咬葉建希手瓜，睇嚟葉建希真係好識冧女。
港男繼續錯字
不過是非無助葉建希人氣，噚日喺港男官網最受關注人氣榜嘅排名上，佢排名尾三，包尾係以龜頭形容會展嘅3號黃田麒，高踞No.1嘅係8號劉志偉，其實劉志偉表演慾甚強，佢喺blog度爆自己為操弗日食一排蛋，可惜佢連文字都食蛋。之前港男被踢爆係字盲，但佢哋似乎冇好好操練，劉志偉嘅錯字多到冇譜，寧願變「令願」、抽時間變「揪時間」、欠缺變「欠決」、不斷競賽變「不段徑賽」，暈未？