效力曼城嘅阿根廷國腳前鋒泰維斯（CarlosTevez）係咪靚仔真係見仁見智，但佢肯定認為自己嘅身材好弗好勁，若然唔係，邊可能咁夠膽，「條條fing」咁同著名音樂人、前Oasis結他手NoelGallagher見面同講波經呀！
話說喺今夏嘅南非世界盃期間，音樂界名人NoelGallagher去咗睇阿根廷嘅比賽，仲喺賽後獲邀請進入阿根廷嘅更衣室。啱啱冲完凉嘅泰維斯，唔知道NoelGallagher喺更衣室入面，於是當佢行出浴室想攞毛巾之際，就喺一絲不掛之下同NoelGallagher打個照面。現年26歲嘅泰維斯咁講：「當時我周圍搵毛巾，點知喺我面前出現嘅，竟然係Gallagher，結果我喺冇着衫冇着褲嘅情況下同佢見面。」
Noel是泰仔頭號「粉絲」
泰維斯又話，之後佢哋握手，而且仲傾咗一陣波經，然後佢先至用毛巾包番住下身。咁即係話，即係佢前妻同女朋友見過嘅嘢，連NoelGallagher都有幸睇到。係人都知NoelGallagher係泰維斯嘅頭號「粉絲」，之前講過如果再生仔嘅話，個名會改做Carlos或者Teve，而佢有幸睇到泰維斯嘅全相，佢就執到啦。但泰維斯夠膽喺自己頭號「粉絲」面前騷身材，睇嚟佢真係唔嘢小，隨時天生異稟，同外號「小結他」法國名將馬基列尼有得揮。
女友布蘭達讚靚仔
可惜在泰維斯個樣唔得，若然唔係，大有可能步龍格保、碧咸、基斯坦奴朗拿度同埋中田英壽等球壇型男嘅後塵，做名牌底褲嘅代言人。話時話，雖則佢個樣真係幾唔得，但所謂「情人眼裏出西施」，所以同佢拍緊拖嘅18歲阿根廷演員兼歌手布蘭達（BrendaAsnicar）睇到嘅嘢亦同一般人唔同。佢話：「佢真係好英俊。雖然佢離咗婚，但始終有個家庭同埋小朋友，所以我要非常小心處理呢段關係。」