因為政改拗到面紅耳熱嘅長毛同蔡耀昌，噚日喺李卓人撮合下，一齊坐車到北角警署，抗議警方就強搶民主女神像一事進行政治檢控。上次「民女」被搶時落大雨，噚日又黑雨淋頭，阿人笑言呢個民主女神名副其實招風雨！
警方指支聯會涉嫌非法展覽「民女」，拉咗支聯會成員，多人噚日到警署報到，長毛雖然冇被拉，但見到支聯會兄弟被針對，即使政見不合都要嚟撐場。支聯會常委會前晚開會，長毛稱當面向華叔講清楚，佢從冇詛咒華叔「癌病上腦」，呢個只係一個問題。長毛稱華叔冇回應。
長毛又指華叔同佢一樣，大約十年前開始嘗試戒煙，其間佢有時會聞到華叔身上有煙味，而佢自己則完全戒唔甩，至今仍然煙癮甚大。