一直同政府不咬弦嘅私隱專員吳斌做埋呢個星期六就講拜拜，噚日同傳媒聚會時盡訴心中情，話任期過咗一半時，已經知道唔會獲延任。早前審計署署長鄧國斌稱未聽過吳斌個名，暗寸吳斌冇做好份工。吳斌噚日有備而來，向傳媒展示澳洲私隱專員畀佢嘅一封信，信中讚揚吳斌任內對保障私隱作出重大貢獻。吳斌出示呢封以示自己並非寂寂無聞之輩，擺明向鄧國斌示威。
誤洩信用卡資料
臨別秋波，吳斌送咗多本書畀記者。佢自言愛買書，藏書數量難以估計，不時會送書畀大學，幾年前一口氣送咗8,000本書畀城大圖書館，後來城大通知佢，話其中一本書入面，竟然夾住一張舊版一千元紙幣，吳斌話既是已出之物，冇取回1,000蚊，捐咗畀公益金。
書中隨時有金執，行家噚日收到贈書即時翻開，果然有料到，有行家發現一張信用卡收據，上有吳斌信用卡資料，私隱專員疏忽保護個人資料，老貓燒鬚。