由效力NBA火箭嘅中國中鋒姚明，牽頭嘅姚基金慈善義賽，今晚喺台北小巨蛋進行第2站，咁啱魔術中鋒懷特侯活又嚟到台北「踩場」；加上尼殊、白朗戴維斯兩位明星球員打完北京站後回美國，姚明為咗加強號召力，就急call近期人氣急升嘅林書豪，連夜飛到台灣助陣，而這次也是他12歲後，再度到台。
無改一貫生活方式
林書豪身為首名美籍台灣人打NBA，又係哈佛高材生，近期喺台灣爆紅，前日佢就收到姚明親自來電，邀請佢飛到台北比賽，擔任後衞的林書豪就話：「當時接到電話很驚訝，姚明可是NBA球星，我又很樂意接受邀請。」本身係虔誠基督徒的林書豪，對加入NBA呢個「花花世界」，並不擔心學壞：「我知道進NBA後會有很多誘惑，也知道NBA生活形態和一般人大不同，我不想說自己比其他人高尚，但是我會努力保持一貫的生活方式，也不會因為進入NBA而改變自己。」林書豪新一季以「7號」球衣為勇士披甲，也是7月上旬效力達拉斯小牛隊NBA夏季聯盟比賽所穿的背號，他說：「這就是上帝的旨意，提醒我在NBA選秀落選，現在才會在這裏的原因。」
身為義賽牽頭人物，姚明周一就已抵達台灣，先進行一系列慈善活動，周一落機冇耐就採訪「八八水災」災民，噚晚就出席慈善晚宴。重頭戲就係今晚喺小巨蛋進行嘅義賽，由美國明星隊對中台明星隊，票價由600至3,000新台幣（145至720港元）不等，門票收益將捐給台灣原住民多族群文化交流協會，作為招待80名台灣兒童赴上海世博的圓夢計劃經費。
中台明星隊精銳盡出，林志傑，陳信安等台灣球星，加埋CBA上海隊成員壓陣，仲盛傳台灣天王周杰倫都會落場。不過美國隊就好似「削啲」，靠B贊寧斯、泰亞拔等新秀，似乎唔多夠照，剛傷癒嘅姚明相信唔會落場。