要知呢期乜嘢最紅，可以去搜尋網站睇吓乜嘢字詞經常俾人search，Google搜尋器更加會將網友搜尋字眼列榜。噚日佢哋公佈半年結，今年上半年最具人氣嘅富豪同樓盤，華華以為實係四叔李兆基同天匯，點知估錯晒！
最多人搜尋嘅富豪名字，原來係已故華懋集團主席龔如心。據有關方面講，持續一段時間嘅華懋千億爭產案，最終喺今年初定案，華懋慈善基金贏咗，當時小甜甜嘅人氣熱到爆燈，之後雖然唔係個個月都排第一，但係累計搜尋次數已經無人能及，你話小甜甜嘅魅力幾巴閉，個人雖然走咗，大家對佢都仲好有興趣。
華華見喺十大榜入面，四叔連名都冇，多口向有關方面打探，「咁阿四叔排第幾呢？」噢，10名不入！唔單止四叔如是，天匯亦10名唔入，可能同資料截至6月底止有關，全年嚟計，或者有機會。
至於排名榜第二位，又係因為「爭嘢」上榜嘅，佢就係亞視主要股東查懋聲。由於亞視股權爭拗，佢同蔡衍明隔住傳媒過招。其間，蔡衍明得到星島集團主席何柱國「聲援」，所以連帶何生都上咗富豪搜尋榜第四位。
除咗人氣富豪，華華仲特別留意樓盤搜尋排行榜，不過結果又係出乎意料，天匯竟然榜上無名！最多人search係賣個滿堂紅嘅YOHOMidtown，好明顯係用家主導。
至於股票搜尋排行榜，最多人search嘅股票係福和（923），佢係今年首季最多人認購嘅新股，自然多人搜尋有關佢嘅資料啦；排第六嘅股票亦值得留意，係陳振聰嘅宏霸數碼（802）！喺華懋爭產官司中，主角之一嘅陳振聰上唔到富豪搜尋榜，但係佢間公司喺股票搜尋榜攞番一席，算唔算有啲安慰呢呵！
今年上半年富豪搜尋排行榜
第1名 龔如心 已故華懋集團主席
第2名 查懋聲 亞洲電視主要股東
第3名 BalramChainrai 香港印度商會前主席
第4名 何柱國 星島新聞集團主席
第5名 李慧鏑 中國移動集團總裁助理
第6名 龐維仁 太平洋資本投資亞洲主席
第7名 黃廷芳 信和集團主席黃志祥父親
第8名 黃光裕 國美電器前主席
第9名 唐煒臻 自稱「中國畢菲特」涉龐氏騙局
第10名 許畯森 國森集團主席
李華華
mailto:[email protected]