香港真趣怪，高地價政策之下，可以建四十幢低密度別墅的無敵海景靚地，只賣一千二百萬，這個價位，只夠在律師醫生向曾蔭權呻買唔到樓的中半山區買一個九百呎以下的單位，單位還要是十年以上二手樓，雖然有個蚊型會所，但樓望樓，絕無海下灣風情。
地產商執到寶，海下和大浪西的地價，遠遠落後大市。村民賤賣土地，認為發展豪宅，可以帶旺海下。那位士多老闆娘，提到外國案例，認定周街酒吧和Starbucks，會讓全區升呢。綠色團體反對地產商蹂躪香港的後花園，士多老闆娘反擊：「要環保就叫他們自己住山洞！」有錢人和乞兒揀，當然住喺有錢人左近好！老闆娘爽快，認錢唔認人，「有錢人出句聲，就可以出錢保育。」哎，海下別墅果真成事的話，又怎樣？「班學生仔，一個杯麪十零蚊都要講價！」即是說，寄望豪宅帶挈，屈質士多變International。老闆娘對闊佬的想法，天真過阿嬌。到豪宅入伙之時，海下士多阿嬸賣杯麪的地方，可能會變成公廁。士多與公廁揀，闊佬業主立案法團二話不說叮走鄉巴阿嬸。有錢人出句聲，邊有得你留低！
我從未去過海下，到大浪西行山也只是一次，跟士多老闆娘比，顯然沒發言權。我只是聯想，住大浪西和海下獨立屋的標準戶，遇上黑色暴雨，點敢回家？有錢佬條命，冇咁賤嘛。