體感遊戲由老任Wii開始登堂入室，嚟緊9月PS3Move亦磨刀霍霍！但論玩法創新，係連手掣都飛甩埋嘅XB360Kinect最掂當！雖然要11月先落場，唔想等？嚟緊星期五《動漫電玩節》，就會有亞洲首次Kinect公開試玩，千祈咪錯過！
記者：許福合
攝影：王文忠
Model：Michael@PureModels
試玩頭3優先買！
Kinect係真正望住你玩、飛甩手掣嘅體感裝置！雖然11月先推出，但嚟緊動漫節會有第一手試玩！而且排頭三名機迷，更可獲優先購買權，想成為最速到手達人，動漫試玩記得爭頭三喇！
碌齡離手 反映力度
玩過Kinect，第一個試後感就係打機原來咁簡單！毋須揸手掣、揮吓手、扭吓屁股，甚至講句話都可以用來玩遊戲。實試咗將會在動漫節首度曝光嘅《KinectSport》，聽落與《WiiSport》有啲相似，但論畫面同操作，就有兩個世代嘅差別；當中有保齡球、足球或競技場，我最愛係保齡，除咗無個波揸喺手外，玩落同現實保齡無分別！尤其係波離手前嘅力度，會直接在遊戲內反映，像真度相當高。
新舊XB360啱用
XB360剛出新版黑機，Kinect是否一定要配新機玩？答案係：否！舊款XB360只要加個轉換器就搞掂（跟Kinect送埋）；至於安裝亦都相當簡單，感覺甚至比Wii來得方便，Kinect只係有一個感應器要安裝，無手掣就無咗配對嘅麻煩，插上Cable就玩得。
位置方面，官方的3-4米遊戲距離，一直係玩家存疑問題，實試係2.5米內都無問題！再行近啲、左啲、右啲會點？畫面會出警示、遊戲會Hold住喺度、玩唔到囉！
遊戲試玩
KinectSport——保齡球場
試玩版暫時只得保齡球同田徑場，可做出極微細體感動作，用力推就將球打出，甚至可以加旋，不過只能順手轉，不能反手。
KinectSport——田徑場
田徑場內有跨欄項目，跑步時只須原地跑；出現跨欄時，見到綠色欄就要預備，黃色就要雙腳跳起，失敗時會撞欄！
DanceCentral
踢腿、拍掌、全身舞動！動作組合上600種，試玩歌暫有90首，LadyGaga嘅《BreakitDown》最好玩，變化多又好聽，唱住跳！
