香港小姐競選會喺嚟緊星期日（8月1日）舉行，噚日15位候選佳麗喺尖沙嘴出席記者會，今年評判有張家輝同熊黛林（Lynn）兩位演藝界代表，幾位評判即場同一班佳麗傾偈，之後仲會畀分，呢個評分會佔總分30%，所以對班佳麗有一定影響，唔怪得有啲佳麗顯得好緊張。
熊黛林被指曾整容
最近被人翻舊賬話佢整容嘅Lynn，同家輝都認為女仔除外貌之外，最重要係內涵，家輝話：「家唔係揀老婆，去飲嘢睇吓女仔，佢係要代表香港形象，所以同睇女仔唔同心情。」不過家好多女仔有公主病，人前人後兩個樣好識扮嘢，家輝好搞笑咁話：「對住我就難啲，你知我係邊科？呢方面我係專科，我會完全拆穿佢西洋鏡。」
今年司儀除咗鐵腳曾志偉同陳百祥外，仲有頂替崔建邦嘅阮兆祥，呢個新組合即場考吓佳麗嘅急才同口才。
認錯彭慧中李雪瑩
本來同班女仔相處得最耐嘅志偉應該最熟識班佳麗，點知佢將8號彭慧中同9號李雪瑩掉轉，當佢知道自己講錯號碼之後佢竟然仲話：「唉！我平時分8號9號係分身材！」搞到兩個佳麗有少少尷尬，8號彭慧中話唔會介意志偉只係認得佢身材，佢話：「我覺得自己有其他優勝過身材嘅地方，就係我嘅笑容。」
現場即時公佈「最具冠軍相佳麗網上投票」，最新結果係4號文凱玲、8號彭慧中、10號馬鈞怡、11號李文煊同qd陳庭欣，10號馬鈞怡最近以黑馬姿態彈出，佢話：「希望到時可以入五強，或者有三甲就已經好開心。」