環顧全球，家陣仲有錢周圍去投資嘅，當然係「阿爺」啦！家啲後生仔咁想去投資銀行做，之不過外國月亮未必夠內地紅太陽靚，華華就有好工介紹嘞！
話說噚日上中投網站，見到有則新消息，就係佢哋刊登咗個招聘公告，話「向全球開展新一輪集中招聘活動」，仲誠邀嚟自唔同國家、文化背景嘅英才加入。
咁邊啲職位請人呢？財務分析師到公關部門都請，不過想入中投都唔係咁易，就以公關外事部客戶關係維護與管理經理呢個post為例，需要具備經濟、法律、國際關係等專業知識，再加3年相關工作經驗，如果喺國際組織、海外相關機構工作過就優先。另外有8項其他要求，操得一口流利英語唔少得，仲要遇事冷靜、自控能力強、保密意識強……達到晒上述嘅要求，做「美女間諜」都應該得。
入得中投就梗係想操盤，咁就要apply相對收益投資部，呢個部門主要負責公開市場股票同固定收益產品傳統投資業務，執行商品市場同貨幣市場策略。心動？Sorry，呢個部門嘅招聘工作仲未正式開始，但係歡迎你寄定簡歷去，啱用嘅中投自然會聯絡你；人工未知有幾好，但一個唔覺意識到董事長樓繼偉，學到一招半式就正啦。
李華華