政改方案峯迴路轉，唔少人對中央以至民主黨願意讓步都好驚奇，主帥煲呔喺政改未露曙光前心驚膽戰毋須多講，有政界中人喺6月初同佢飯局時，聽到佢大呻做得好冇癮，猛話自己好痛苦，差在冇講腳痛要即刻執包袱走人。
反而身為特首辦主任嘅譚志源就係明天會更好嘅樂天派，反過嚟鼓勵煲呔，政改應該搞得掂，難道佢未卜先知？有高人又同八方講，人大常委范太6月初已經同人講，相信民主黨個方案冇違反人大決定，唔似得煲呔咁冇信心。
漏夜過大海祭岳父
立法會經過三日辯論，政改方案終於成功「起錨」，有消息話喺禮賓府睇直播嘅煲呔，心情激動得流下男兒淚，但八方喺煲呔其後舉行嘅記者會中，只見到佢個一副亢奮梗樣，絲毫唔覺眼紅紅，唔似咁感性喎。
有傳煲呔喺政改方案通過當晚，即刻同埋太太鮑笑薇漏夜去澳門，拜祭岳父同岳母，唔知係咪多謝先人保佑佢大步檻過。有政界中人話中聯辦喺政改一役都好落力，「第二支管治隊伍」、研究部部長曹二寶都四出向政界中人摸底，絕對唔係煲呔咁廢廢哋。