禍從口出，社民連前主席黃毓民應該最有感受。佢在五區公投出席商台選舉論壇時，與謝偉俊互罵，衝口而出叫詹培忠「買起佢」，結果收到金勞詹律師信告佢誹謗。
八方聽聞，連日來有唔少城中名人為毓民向金勞詹「求情」，包括林炳昌以及李鵬飛，佢哋為毓民講好說話動機不明，可能係睇在朋友份上幫吓口，據聞飛哥勸金勞詹收手時，更透露毓民已經還咗錢畀佢，曲線多謝金勞詹曾經喺會議廳踢爆毓民欠債未還。
雖然說客輪流上門，但金勞詹呢鋪企硬，據聞佢已經預咗攞500萬出嚟同毓民打官司，聲言一定會搵最威猛大狀討回公道。呢500萬元，睇嚟毓民唔慳得。