金融海嘯前人人問：「買咗股票未？」海嘯後最多人問：「買咗樓未？幾時上車好？」已上車的考慮套現賺一筆，未上車的擔心錯過入市良機，筆名「老樓」的資深傳媒人劉兆昌指，樓市正經歷97後第二次大牛市，入市與否金科玉律是「實地觀察，量力而為」。
80後苦等為了取經
劉兆昌在報章有多個專欄，其中一個是《蘋果》的〈老樓周記〉，今年他人氣繼續急升，開設了個人網站，書展也出版了處女作《輕鬆買間黃金屋》。在會展接受記者訪問期間，不斷有人向他揮手「Sayhi」，三名80後青年更在旁癡癡苦等近一小時，為的是簽名和合照。60後的老樓魅力不遜o靚模，全因他多次準確預測樓市起跌，成為「樓市黃大仙」。
一切都源於80年代他入行做記者，在珠海書院讀傳理的劉兆昌說：「當時有教授介紹去報館財經版，咪去試吓囉。」適逢80年代樓市起飛，劉兆昌順理成章成為第一代地產版記者。「嗰陣一做上癮，好有心機去睇樓盤，成日放假都落區睇二手樓。」
今天買樓人人都說透明度不足，劉兆昌說從前更加離譜，既沒有示範單位，資訊也不及今天多，他為了解樓盤真貌，除直接到地盤視察，還會上山下海，他說：「我試過爬上個山坡，親眼去睇棟樓起到嘅高度，會望到乜嘢景觀，總之要盡量爭取去現場睇。」
有人說地產商越來越邪惡，多了很多蠱惑招，劉兆昌想了想說：「地產商本質從來都冇變，都係想賺錢，只不過當年買咗樓嘅小市民都有錢賺，自然唔覺得有問題。」他舉例說當年買樓前都不會知道價錢，買家要到櫃位指明要某個單位，職員才會從「枱底」拿出價錢牌與買家「商量」。
來年大有可能加息
97年前後是樓市黃金歲月，劉兆昌說：「當時好多人買樓只問幾多錢？有冇貨？買完連層樓睇都未睇過已經轉手賺一筆。」經歷樓市泡沫爆破，劉兆昌認為大部份香港人都「學精咗」，懂得爭取消費者權益，才會有今天「9招12式」。
說了一大堆，相信讀者最想問：「家入市好唔好？」老樓答：「家樓價唔係話貴，但一定唔係低。」「樓市黃大仙」的答案，留待讀者自行參透。不過記者大膽總結劉兆昌意思，來年大有可能加息，樓市又似乎已見泡沫，若非急着買樓自住，應該儲定銀彈，等待「撈底」良機。至於買樓時應該注意哪些細節和技巧，請讀者繼續留意《蘋果》的〈老樓周記〉或者買他的處男作。記者 林浚川