被譽為香港科技之光、小馬哥大讚，喺上海世博有專題介紹嘅八達通，原來一直出賣緊香港人，利用市民私隱嚟搵錢。八達通卡喺香港唔止人手一張，係幾乎人手三張，富豪、高官、小市民今次終於人人平等，喺八達通面前通通冇私隱，行政總裁陳碧鏵唔落台相信難息民憤。
登記名字係陳碧華
八方翻查公司註冊處資料，發現呢位八達通一姐登記名字係陳碧華，華並無金字旁，有別於佢行走江湖用個鏵字，點解個名會多咗個金字邊呢？八達通公司冇解釋，只係話佢哋發出嘅新聞稿同文件，一直都係用鏵字。
好多人信改名可以轉運，八方請教玄機命理顧問馬然，佢話如果陳碧鏵真係改名用金字旁鏵字，呢個字似乎唔多夾佢命格嘞，因此搞到陳小姐近日是非纏身，「金屬可以做成利器，如果佢近日運程唔好，傷害就更加大。」
馬然又指，俗語稱一命二運三風水，名字對一個人嘅際遇影響只係排第六，所以陳碧鏵近日多負面新聞，未必同個名有好大關係，「就算佢唔用金字旁個鏵字，都未必逃得過呢一劫」。玄學家何榮軒則話，從照片所見，陳碧鏵額高、顴闊，屬女強人面相，若然佢得高人指點而在名字加個金字，可能係因為命格五行欠金，因此改名以利事業。
何榮軒又指，八達通屬於金融行業，一般情況下，從事金融業嘅人，名字有個金字對工作會較為順利，陳碧鏵今次成為箭靶，或者同流年不利有關，就算用回冇金字旁個華字都於事無補，「攝太歲，或者去旅行，行開吓離開是非，冲喜吓仲好。」
吳斌攞尾彩獲歡送
家陣風頭火勢，恐怕陳碧鏵有排未甩得身，倒數離任嘅私隱專員吳斌卻攞尾彩。返埋今個星期工就任滿嘅吳斌，噚日最後一次以專員身份去立法會，其間乘機呻政府提供資源不足，令公署打唔到大老虎，同八達通等出賣市民私隱搵大錢嘅大公司比較，自嘲「我侏儒都不如」！會議結束時，議員齊齊拍枱代拍掌歡送吳斌，表面上抬舉吳斌，實際係向候任私隱專員蔣任宏施下馬威。
mailto:[email protected]