上季喺港甲排第5嘅晨曦噚朝開操,而球隊今季有唔少改變,除搵咗上季幫飛馬捧走足總盃嘅列卡度執教,但留番高尼路同劉志強等老將,實行以老帶新打江山。下個月14號就37歲嘅隊長高尼路開操前話,好大機會踢埋今季就收山,掛靴後會回歸祖家巴西。
高尼路喺98年跟米路嚟香港加盟南華,話咁快就踏入12年,早幾年為幫港隊踢國際賽,仲攞埋特區護照。佢話因為仍享受比賽,決定踢多一季,但佢8歲嘅囡囡成日問點解唔返祖家同家人一齊住,於是決定踢埋今季就返歸陪家人。
或搞告別賽
晨曦會長周文亮計劃同高尼路搞告別賽,但就擔心入場球迷唔多,如果南華肯支持又唔同講法。相信好多球迷同求大俠一樣唔捨得呢位為香港足球作出過好多貢獻嘅鐵漢。問到周生,晨曦今季簽咗咁多後生仔,班費預算應該會少啲,但佢猛耍太極,話班費冇乜點計。上季晨曦使咗800萬港元,至於今季幾多?大家要估吓!