錢多到冇碇使嘅大陸富豪，又有花錢途徑；中國郵票珍品拍賣會今個禮拜六起，一連兩日喺香港柏寧酒店舉行，公開拍賣逾2,200項珍貴郵品，總估值高達4,500萬港元。
拍賣公司InterAsiaAuctions董事舒耐特指，1897年發行嘅「清朝紅印花綠色加蓋郵票小字2分新票」，俗稱「綠衣紅娘」，係呢次拍賣焦點，估價800萬港元，如果以呢個價成交，有望成為全球最貴嘅中國郵票。
呢張古董郵票紅卜卜，舒耐特話紅印花設計係中國古董郵票嘅經典，深受收藏家歡迎。現存嘅「綠衣紅娘」只有九張，其中兩張已經畀內地博物館「據為己有」，因此呢次拍賣特別矜貴。喺1911至1949年期間發行嘅「民國五珍」係拍賣另一焦點，當中以「北京二版帆船郵票4分暫作3分倒蓋新票」最罕有，估價100萬港元。