鄉議局石門新大樓建造工程進度理想，預計年底可以搬，8月3日搞新大樓籌款首映，主禮嘉賓係盛傳已經喺下屆特首跑馬仔中墮馬嘅鬍鬚曾，8月5日搵嚟下屆特首大熱唐唐同中聯辦副主任周俊明主持平頂儀式。咦，點解獨漏近期舉動頻頻嘅梁振英嘅？
發叔數口精
鄉議局主席劉皇發話，CY當然唔係冇貢獻，仲大爆CY喺新大樓項目捐咗唔少錢，好明顯CY都好清楚鄉議局嘅選票實力有幾雄厚。發叔又話，約兩個月前，CY宴請一班前任同現任行政會議成員一齊去佢屋企食飯，廖長城、錢果豐等都係座上客。
發叔聲稱餐飯風花雪月冇乜傾正經嘢，遑論CY係咪去馬選特首呢個題目，但散席時來賓都獲贈CY親手種嘅花一盆。至於點解要搞呢餐飯？發叔笑笑口話可能個個人都有票啦。講到計數，發叔真係有一手。
發叔大公子劉業強喺鄉議局越來越活躍，接班之意非常明顯。不過發叔對愛兒表現仲未滿意；如果要打分，話佢仲未合格，但強調唔係話阿仔表現差，只係佢對親人要求較其他人更高，叫強仔加把勁。