曼市雙雄周日喺美國齊吃悶棍，曼聯以眾凌寡負肯薩斯巫師1:2；曼城亦以相同比數負紐約紅牛。其中紅魔之敗並唔係輸喺「巫師」嘅法術，而係好似領隊費格遜所講，班o靚仔輸經驗，更重要敗於球證之手。賽前戲言想同保羅麥卡尼（PaulMcCartney）合唱嘅費Sir笑唔出，真金白銀捧曼聯嘅更加笑唔出。
曼聯W由前日見報嘅1.3倍起票到1.27倍，真係熱無可熱。場波有好多賣點，包括係有52,424人入場刷新肯薩斯巫師主場入座紀錄；另外又用來季英超新波比賽，不過賽後最多人談論係巫師嘅爭議奠勝球。話說貝碧托夫喺上半場39分鐘禁區內，博得對方球員干拉特犯規出場，隨即射入12碼扳平1:1。不過到42分鐘，巫師球員基卡馬拉頭槌中楣底彈出，球證判入。
我求大俠翻睇好多次慢鏡，覺得個波未入晒白界，擺明枉判。世界盃「林柏特事件」未夠一個月，估唔到英格蘭球隊又一次受球證枉判所累。
話得說回來，其實今次曼聯亦係輸自己。費Sir一心試小兵，條防線由拉菲爾達施華、基斯史摩寧、莊尼伊雲斯同埋迪拿特組成，門將一職就由阿莫斯擔任；結果證明班小兵經唔起考驗，第一個失球（11分鐘）就俾阿拿奧特突破越位，幾個小將唔係得個企字就係只識舉手。
費Sir：o靚仔輸經驗
費Sir賽後就向幾個小將派發「成績表」，當然唔及格：「喺頭15分鐘，佢哋完全暴露經驗唔夠嘅問題。」由於保羅麥卡尼近日亦身在肯薩斯，仲同曼聯同住一間酒店，費Sir賽前仲講笑話想兩個阿Sir大合唱，但睇完「防線4小將」嘅演出，唔慌笑得出。
曼城同日排出一個弱陣，以1:2輸畀有亨利壓陣嘅紐約紅牛。講開曼城，意大利前鋒巴洛迪利嘅經理人已否認前者落實簽曼城，但怕且係想吊高嚟賣，斷估呢宗交易好快完成。
