劉嘉玲前年同梁朝偉拉埋天窗，名正言順成為梁太，但係有關嘉玲嘅緋聞依然不絕於耳，噚日有報道話嘉玲同內地神秘富商景百孚過從甚密，仲登埋佢哋一張親密照，相中嘉玲同景百孚面貼面影相，男方仲攬住嘉玲嘅大髀㖭。不過偉仔噚日就透過經理人公司發言人表示：「普通正常社交活動，我絕對相信嘉玲。」
地產派對撻着
聽聞嘉玲同景百孚舊年先認識，呢位低調富豪原來只有39歲，但係身家已經過百億，業務當中以房地產為主，不過景百孚係有香港永久居留權。舊年10月，嘉玲應邀返內地為景百孚一個房地產項目做動土嘉賓，夜晚嘉玲就同其他嘉賓一齊出席大會party，結果造就佢同景百孚火速撻着，據知嗰張親密相就係當晚影，唔知因乜原因流傳出去。
曾被目睹共膳
跟住仲有下文，據知嘉玲同景百孚一直保持聯絡，好似今年5月，偉仔拍緊嘅新戲《一代宗師》停工返咗香港，但嘉玲就俾人見到喺北京同景百孚撐枱腳鋸扒，可見友情非淺。