買一送四辣味套餐　倒及牙惡霸

夏日熱辣辣，平治怕車主唔夠㷫，將ML350火上加油，免費送上AMG加辣套餐，為車身追加AMG包圍、一體化圓形霧燈、21吋AMG合金輪圈及死氣喉，買一車送四配件大優惠，搞到車主㷫烚烚周身痕，係時候落定降溫！

記者：許維雅
攝影：伍慶泉
Model：[email protected]

免費加碼名牌配備

買車時總會想加些Options令車更個人化，更貼近自己需要，不過到最後都會同你逐樣計數，然後就會發現幾千幾千加落去，埋單價多數OverBudget。講到平治車系，AMGOptions更是男士們夢寐以求的名牌配備，不過件件價錢不菲，就算捨得加都未必過到老婆大人嗰關。如果免費又點睇？
平治代理於今個夏天推出的小改款ML350，免費追加AMGSportPackage，於外形上求變，當中包括AMG前後裙腳包圍、AMG電鍍雙尾喉、襯上電鍍飾邊的內置一體化圓形霧燈及21吋AMG五輻式合金輪圈。換上總值約十萬元的配備卻維持車價不變，一定唔怕老婆詐型。本身感覺屬斯文SUV類型的ML車系，加了Options即時充滿動感辣味，加上早前又推出了最低門檻的ML300，要促銷價錢及性能屬中游分子的ML350，AMGOptions無疑是最大的吸引力。

■駕駛席的設計夠闊落，有型之餘又揸得舒適。

■摺合後排座椅騰出的闊偌尾廂空間，是另一吸引之處。

加保護鋼板惡相

起初以為加碼的ML350外形分別不大，借來試駕細心摸索，殊不知一見真身就俾兩對特大21吋合金輪圈吸引住，難怪男人成日話換鞋如換車，換上新鞋的ML350確實特別醒神搶鏡，AMG前後裙腳包圍所跟的啞色電鍍車底引擎保護鋼板，一凹一凸的造型設計加強車身輪廓之餘，更好似幫車頭加了一對倒及牙，隨即變得惡形惡相。
雖然性能及內櫳方面並無任何改動，但備有272匹馬力的3.5公升V6引擎於上大斜路時，已表現出力量十足的一面，加上低至2,400轉便可釋出35.7kgm的扭力、DSR輪胎力量分佈等電子系統協助，ML350的越野能力足夠應付不同路面情況。至於內櫳，亦是一貫高貴的真皮襯桃木裝潢，司機位承托力十足的座椅、連貫中控及手枕的金屬柄點綴即使不變亦依舊吸引，當然可以送埋AMG軚環就更加無敵啦！