環境局力谷停車熄匙立法，職業司機嗌晒救命，三催四請終於逼到環境局局長邱騰華實地體驗焗桑拿滋味，相關議員亦獲邀參加。噚日中午攝氏30幾度，議員第一站去巴士總站，試坐冇冷氣嘅巴士，上層車廂熱到攝氏46度，唔係一般人頂得順。玩完第一站，梁耀忠已經身水身汗，成個水人咁。邱局長就大話夾好彩，皆因巴士呢個環節係臨時加插，佢咁啱有其他會議，話嚟唔到喎，執番身彩。
玩足半日，嘆齊的士、小巴同有蓋巴士站各式桑拿，一直話唔係好熱嘅余大狀，都有拎把私伙風扇仔出嚟降吓溫，佢仲大讚邱局長犀利，打住呔竟然冇乜汗，真係忍得！