國寶大熊貓樣子趣致，好多港人都想抱一抱。噚日同太太鮑笑薇去四川考察時嘅煲呔曾蔭權，一到達就去咗親親大熊貓。煲呔喺政改方案通過後心情靚晒，噚日伸手摸熊貓嗰陣，唔知係唔係因為自信心返晒嚟令佢落手重咗，小國寶突然仆咗落地，搞到煲呔夫婦抱熊貓影例牌相時，熊貓直頭冇面畀，完全唔望鏡頭。
煲呔此行最主要都係視察災後重建工程，噚日朝微雨下探大熊貓，差啲跣親。八方記得當年中央送一對大熊貓畀香港做禮物，當時嘅政務司司長許仕仁去四川揀選，肥龍得到大熊貓嘅熱情招呼，同國寶又攬又錫；但今次煲呔參觀雅安嘅大熊貓繁殖基地，明顯受到國寶嘅冷待。睇到嘅電視畫面，雖然同大熊貓拍埋一齊，但煲呔明顯唔及食物吸引，要煲呔主動出手「強抱」，先至可以同熊貓仔嚟張大合照。
曾太出手幫夫
煲呔同熊貓玩嗰陣，其中一隻畀佢放上架車度扮揸車時，顯然好唔情願，即刻走落地。又有一隻坐喺地嘅，喺煲呔一伸手之下突然打側瞓身跌喺度，唔知係唔係俾煲呔用力太大推跌呢？瞓咗喺地嘅熊貓論論盡盡，一時間起唔番身，睇到佢嘅目光望向工作人員想人幫手，跟住就有人扶佢坐番正，時間雖然好短，但曾太反應好快咁，將手上嘅食物遞過去，似要替老公賠禮，反而煲呔就一直企喺度乜都唔做。好彩啲熊貓唔似香港嘅80後、90後咁抗爭，否則煲呔就有排麻煩。
四川大地震至今兩年，立法會撥款90億賑災，民間捐款亦過百億，外界都好關注呢筆撥款究竟係咪真係用嚟重建，抑或係捐完冇咗影。煲呔今次去四川，主要都係視察撥款重建項目進展情況。其中喺卧龍嘅重建工程，涉及特區撥款嘅23項工程。
mailto:[email protected]