小妹老友Jan啱啱喺南韓返嚟，成個人精神晒，「衰婆，係咪去咗修補吓咁呀？」個個都咁問佢，佢死都唔認，其實當地整容好普遍，上次喺首爾地鐵都見到兩個女仔眼皮、鼻樑都貼住紗布，好明顯趁lunch整完再返工。
呢啲無頭公案搵包公審啦，但韓國女仔皮膚好係事實。
上次去首爾都發現當地超市唔少食物都講究美肌美白，其中一款叫做「美人拉麪」，見到都忍唔住買嚟試吓，近日竟然喺九龍城見到有得賣。
白蓮子令皮膚白滑
早排燒烤聚會撞到舊同事阿輝，轉咗去蕭邦貿易做嘅佢話，係佢公司引入呢款麪嘅，同類喺香港絕無僅有，而美人拉麪系列選用了韓國正宗麪粉製成麪糰，最特別係加入美顏粉喎，例如一款「白蓮子麪」，韓國人認為蓮子有美容功效，韓國美少女皮膚咁白滑（阿輝又知？佢老婆婆要小心），全因為自小飲蓮葉茶。
佢話白蓮子麪，係喺麪粉加入咗白蓮根部、葉部。根部擁有高纖維，能幫助消化，排清宿便；蓮葉能抗氧化，達至美顏效果。
佢話韓國OL同少女，將白蓮子麪視為美容食品。美人拉麪家喺蕭邦貿易九龍城專門店有售，每包$8，$15兩包，之後喺百貨公司有售。
電郵：mailto:[email protected]